नंदुरबार : दोन महिन्यांपूर्वी शहादा येथे आयुर्वेदीक औषधी बनविण्याच्या कारखान्यावरही कारवाई करून सील करण्यात आले होते. यानंतर आता आणखी एक मोठी बातमी समोर आली आहे. विना परवाना पापड मसाला उद्योग केल्याप्रकरणी अन्न व औषध प्रशासन विभागाने मोठी कारवाई केली. याप्रकरणी अन्न व औषध प्रशासन विभागाने तपासणी करून उद्योग बंद करण्याचे आदेश दिले आहेत. तसेच 9 लाख 48 हजार 937 रुपये किंमतीचा मसालासुद्धा जप्त केला. नंदुरबार जिल्ह्यातील शहादा तालुक्यातील बामखेडा याठिकाणी कारवाई करण्यात आली. तसेच अन्न नमुन्यांची तपासणी केल्यानंतर पुढील कार्यवाही केली जाणार आहे.
नंदुरबार जिल्ह्यातील शहादा तालुक्यातील बामखेडा याठिकाणी धनंजय पापड नावाचा पापड मसाला उद्योग सुरू होता. बामखेडा येथील केशव मोहन पटेल यांचा हा मसाला उद्योग आहे. याबाबत अन्न व औषध प्रशासन विभागाला माहिती मिळाली होती. यानंतर अन्न व औषध विभागाच्या पथकाने तपासणी केली असता हा उद्योग विना परवाना सुरू असल्याचे स्पष्ट झाले. यानंतर पथकाने पापड मसालाचे 6 नमुने विश्लेषणासाठी घेतले आहेत.
याठिकाणाहून अन्न व औषध प्रशासनाच्या पथकाने एकुण 6971 किलो असलेला एकूण 9 लाख 48 हजार 397 रुपयांचा साठा जप्त केला. तसेच धनंजय पापड मसाल्याचे मालक केशव मोहन पटेल यांना उद्योग तातडीने बंद करण्याचे निर्देश देण्यात आले आहेत. तसेच अन्न नमुने तपासणीनंतर अहवाल प्राप्त होताच कार्यवाही केली जाणार आहे. दरम्यान, ही कारवाई अन्न व औषध प्रशासनाचे सहायक आयुक्त एस.एस.देवरे, अन्न सुरक्षा अधिकारी आ.भा.पवार, म.ब. भावसार, म.ना. चौधरी यांच्या पथकाने केली.
