अमळनेर, 15 मार्च : अमळनेर तालुक्यातील झाडी येथून धक्कादायक घटना समोर आली आहे. झाडी येथे झोपडीला लागलेल्या आगीत तब्बल 19 शेळ्यांचा जळून मृत्यू झाल्याची घटना आज, 15 मार्च रोजी पहाटे अडीच वाजता घडली.
काय आहे संपूर्ण बातमी? –
मिळालेल्या माहितीनुसार, झाडी येथील शिवदास यादव भिल यांच्या घराच्या मागील बाजूस असलेल्या झोपडीत शेळ्या बांधलेल्या होत्या. पहाटे अडीच वाजेच्या सुमारास अचानक झोपडीला अचानक आग लागल्याचे दिसून आले. दरम्यान, आरडाओरडा करून आजूबाजूच्या नागरिकांना बोलावण्यात आले. गावकऱ्यांनी आपापल्या परीने आग विझवण्याचा प्रयत्न केला.
19 शेळ्या जळून खाक –
अमळनेर नगरपालिकेच्या अग्निशमन बंबाने आग आटोक्यात आणली. या भीषण आगीत तब्बल 19 शेळ्या जळून खाक झाल्या असून 2 शेळ्या गंभीर जखमी झाल्या आहेत. दरम्यान, शेळ्यांवरच उदरनिर्वाह असल्याने शिवदास भिल यांचे कुटुंब उघड्यावर आले आहे. त्यांना आर्थिक मदत मिळावी, अशी मागणी आता केली जात आहे.
हेही वाचा : धुळ्यातील पोलीस प्रशिक्षण केंद्रात जवानांना विषबाधा, काय आहे संपुर्ण बातमी?
