नाशिक, 5 एप्रिल : राज्यात दिवसेंदिवस अपघाताच्या घटनांमध्ये वाढ होत असताना नाशिक जिल्ह्यातील दिंडोरी-नाशिक मार्गावर भीषण अपघात झाल्याची घटना आज दुपारी 2 वाजेच्या सुमारास घडली. बोलेरो आणि बाईकची समोरासमोर झालेल्या धडकेत 5 जणांचा मृत्यू झाला असून 4 जण गंभीर जखमी झाले आहेत.
काय आहे संपूर्ण बातमी? –
नाशिकमधील नाशिक-दिंडोरी मार्गावर आरोग्य विज्ञान विद्यापीठासमोर बोलेरो गाडी आणि बाईक यांच्यात समोरासमोर धडक झाली. ढकांबे गावाजवळ झालेल्या भीषण अपघातात बाईकवरील दोघांचा तर बोलेरो गाडीतील तिघांचा अशा पाच जणांचा मृत्यू झाला. यामध्ये असून 4 जण गंभीररित्या जखमी झाले असून जखमींची प्रकृती चिंताजनक असून जखमींना उपचारासाठी तातडीने रुग्णालयात दाखल करण्यात आले आहे. दरम्यान, बोलेरो गाडीचे टायर फुटल्याने हा अपघात झाला असावा असा अंदाज वर्तवण्यात येत आहे.
जखमींवर उपचार सुरू –
अपघाताची माहिती मिळताच, स्थानिक ग्रामस्थांनी घटनास्थळी धाव घेत मदत आणि बचावकार्य सुरू केले. दिंडोरी पोलीस सुद्धा घटनास्थळी दाखल झाले. जखमींना तातडीने उपचारासाठी जवळच असलेल्या रुग्णालयात दाखल करण्यात आले असून अपघातात मृत पावलेल्या व्यक्तींची ओळख पटवण्याचे काम सुरू असून त्यांचे मृतदेह हे नाशिक जिल्हा शासकीय रुग्णालयात पाठवण्यात आले आहेत. घटनास्थळी दाखल झालेल्या पोलिसांकडून हा अपघात नेमका कसा झाला याबाबत तपास सुरू आहे.
हेही वाचा : लोकसभा निवडणुकीसाठी काँग्रेसचा जाहीरनामा प्रसिद्ध, जाणून घ्या ठळक मुद्दे
