पुढच्या आठड्यात या दिवशी सुप्रिया सुळे जळगाव जिल्हा दौऱ्यावर; पाचोऱ्यालाही येणार, असे असेल नियोजन 

जळगाव : विधानसभा निवडणुकीला अवघे अडीच ते तीन महिने बाकी राहिले आहेत. त्यामुळे आता प्रत्येक पक्षाने आपापल्या पद्धतीने तयारी करायला सुरुवात केली आहे. याच पार्श्वभूमीवर राष्ट्रवादी काँग्रेस पक्षाच्या (शरद पवार गट) नेत्या आणि खासदार सुप्रिया सुळे या 17 ऑगस्ट रोजी जळगाव जिल्ह्याच्या दौऱ्यावर येत आहेत.

सुप्रिया सुळे या पुढच्या आठवड्यात जळगाव जिल्ह्याच्या दौऱ्यावर येत आहेत. शनिवारी 17 ऑगस्ट रोजी त्या जळगाव जिल्ह्याच्या दौऱ्यावर येत आहेत. सुरुवातीला चाळीसगाव शहरात त्यांचे आगमन होईल. यानंतर या दौऱ्यात त्या चाळीसगाव, भडगाव-पाचोरा, पारोळा, धरणगाव व अमळनेर या ठिकाणी भेटी देणार असून तेथे महिलांचा मेळावा होणार आहे. यानंतर त्या धुळ्याकडे रवाना होतील अशी माहिती माजी मंत्री डॉ. सतीश पाटील यांनी दिली.

दरम्यान, आगामी विधानसभा निवडणूक अडीच ते तीन महिन्यांवर येऊन ठेपली आहे. त्यामुळे सुप्रिया सुळे यांचा हा दौरा महत्त्वाचा मानला जात आहे. जळगाव जिल्ह्याचा विचार केला असता याठिकाणी महायुती आणि महाविकास आघाडी अशी थेट लढत होणार आहे. लोकसभेतील यशामुळे महाविकास आघाडीचा उत्साह दुणावला आहे. त्यामुळे महाविकास आघाडीतील प्रत्येक पक्ष अधिकाधिक जागा कशा मिळतील या प्रयत्नात आहे.

प्रत्येकजण आपला पक्ष कसा वाढेल यासाठी प्रयत्न करीत असतो. त्यामुळे जास्त जागा मागणे आमचे काम आहे. महाविकास आघाडीच्या वरिष्ठ नेत्यांच्या बैठकीत जागा कमी जास्त होऊ शकतात. पण ज्या मतदारसंघात ज्या पक्षाची ताकद जास्त तेथे ती जागा त्या पक्षालाच सुटावी आणि तिन्ही पक्षांनी हे मान्य करायला हवे, अशी भूमिका राष्ट्रवादी काँग्रेस शरदचंद्र पवार पक्षाचे जिल्हाध्यक्ष प्रमोद पाटील यांनी मांडली.