जळगाव, 25 एप्रिल : आज जळगाव लोकसभेच्या भाजपच्या उमेदवार स्मिता वाघ आणि रावेर लोकसभा मतदारसंघाच्या भाजपच्या उमेदवार रक्षा खडसे आपला उमेदवारी अर्ज दाखल करणार आहे. राज्याचे उपमुख्यमंत्री आणि भाजपचे ज्येष्ठ नेते देवेंद्र फडणवीस यांच्यासह मंत्री गिरीष महाजन, पालकमंत्री गुलाबराव पाटील, मंत्री अनिल पाटील यांच्या उपस्थितीत त्या अर्ज दाखल करण्यात येणार आहे. यावेळी महायुतीच्या वतीने जोरदार शक्तीप्रदर्शन करण्यात येणार आहे.
जळगाव लोकसभा मतदार संघाचा विचार केला तर भाजपच्या स्मिता वाघ यांच्यासमोर महाविकास आघाडीचे उमेदवार करण पवार यांचे आव्हान आहे. तर तेच तिकडे रावेर लोकसभा मतदारसंघाचा विचार केला तर रक्षा खडसे यावेळी तिसऱ्यांदा निवडणुकीच्या रिंगणात आहेत. त्यांच्यासमोर यावेळी महाविकास आघाडीचे उमेदवार श्रीराम पवार यांचे आव्हान आहे.
दरम्यान, कालच महाविकास आघाडीच्या उमेदवारांनी प्रमुख नेत्यांच्या उपस्थितीत जोरदार शक्तीप्रदर्शन करत उमेदवारी अर्ज दाखल केले. यानंतर आज महायुतीच्या वतीने शक्तीप्रदर्शन करत स्मिता वाघ, रक्षा खडसे उमेदवारी अर्ज दाखल करणार आहेत.
उमेदवारी अर्ज भरण्यापूर्वी रक्षा खडसे काय म्हणाल्या?
ज्या पद्धतीने लोकांनी मला निवडून दिलं होतं यावेळीही जनता माझ्या पाठीशी राहील. चांगल्या मतांनी मला विजयी करुन देईल आणि माझ्या माध्यमातून, म्हणजे लोकं मतदानाच्या माध्यमातून मोदीजी तिसऱ्यांदा पंतप्रधान व्हावेत, अशी त्यांची इच्छा आहे. निवडून आल्यानंतर मोदीजींच्या नेतृत्त्वात चांगले कार्य मला करायचे आहे. 10 वर्षे मला जनतेने संधी दिली. मला जे जे शक्य झालं, ते सर्व कामे मी केली. माझा जनतेवर विश्वास आहे. लोकांचाही माझ्यावर विश्वास आहे. त्यामुळे समोर कुणीही उमेदवार समोर असला, तरी जनता माझ्या पाठीशी आहे, असे त्या म्हणाल्या.
