जळगाव, 18 जुलै : राज्यभरात अपघाताच्या घटनांमध्ये वाढ झाली असताना जळगाव शहरातून अपघाताची बातमी समोर आली आहे. जळगावातील मेहरुण परिसरातील मंगलपुरीत गल्लीत आपल्या घरासमोर उभे राहून गप्पा मारणाऱ्या 5 महिलांसह 2 चिमुरड्यांना भरधाव कारने जबर धडक दिल्याची घटना आज सायकांळी 6.30 वाजता घडली. दरम्यान, या घटनेत एका वृद्ध महिलेचा जागीच मृत्यू झाल्याची माहिती समोर आली आहे. शोभा रमेश पाटील (वय 60)असे मृत महिलेचे नाव आहे. तसेच या अपघातात चार महिला जखमी झाल्या आहेत.
काय आहे संपुर्ण बातमी? –
मिळालेल्या माहितीनुसार, जळगावातील मेहरुण परिसरात अत्यंत अरुंद रस्ता असलेल्या मंगलपुरी भागात आज गुरुवारी सायंकाळी काही महिला आपल्या घरासमोर उभ्या गप्पा मारत होत्या. तसेच एक महिला रस्त्यावरुन जात होती. दरम्यान, त्याचवेळी रामेश्वर कॉलनीकडून एक भरधाव कार (एम.एच.05 ए.एस 0574) रस्त्याने भरधाव आली. कारवर चालकाचे कुठलेही नियंत्रण नसल्याने कारने घरासमोर उभ्या असलेल्या या महिलांना धडक देत उडविले. दरम्यान, या धडकेत दुध घेण्यासाठी जात असलेल्या शोभा रमेश पाटील यांना गंभीर दुखापत होवू त्यांचा जागीच मृत्यू झाला.
चार महिला जखमी –
तर त्यांच्यासोबत असलेल्या संगीता प्रकाश महाजन (वय 48), जयश्री जगदीश राऊत (वय 30), सुमनबाई साहेबराव पाटील (वय 65), अर्चना पाटील (वय 40) या चार महिला जखमी झाल्या आहेत. तर दोन लहान मुले देखील जखमी झाल्याची माहिती मिळाली.
जखमींवर उपचार सुरू –
विशेष म्हणजे या अपघातात एका महिलेच्या हातात असलेल्या चिमुकल्यासही दुखापत झाली असून सुदैवाने त्याचे प्राण वाचले आहेत. (केसीएन)या घटनेमुळे परिसरातील लोक जमा होवून त्यांनी तात्काळ जवळच्या खाजगी रुग्णालयात दाखल केले. जखमी महिलांपैकी एकीचे पती प्रकाश महाजन यांनी जखमींना अपघातग्रस्त कारमध्येच टाकून शासकीय वैद्यकीय महाविद्यालय व रुग्णालयात आणल्यानंतर जखमींवर तेथे तातडीने उपचार सुरु करण्यात आले.
कारचालकाला दिला चोप –
याप्रकरणी एमआयडीसी पोलीस स्टेशनला घटनेची नोंद करण्याचे काम सुरू होते. या अपघातातील कारचा चालक पवन कैलास पाटील (वय 25 रा. सप्तशृंगी कॉलनी रामेश्वर कॉलनी मेहरूण, जळगाव) हा नवशिक्या असल्याचे समोर आले आहे. दरम्यान, जमावाने कार चालकाला चांगलाच चोप दिला असल्याने त्याला उपचारासाठी दाखल करण्यात आल्याची माहिती समोर आली आहे.
हेही वाचा : Arun Bhatia Interview : ‘देशात भ्रष्टाचार एक धंदा’, Ex IAS अधिकारी अरुण भाटीया यांची स्फोटक मुलाखत
