पाचोरा, 11 जानेवारी : शेतकऱ्यासाठी कापूस हे सोने असते. आपल्या मुलाला जसे जपले जाते, तसा शेतकरी आपल्या शेती पिकाला जपतो. सध्या कापसाचा हंगाम सुरू आहे. काही जण कापूस विक्री करत आहेत. तर काही जण कापसाच्या भाव वाढण्याची वाट पाहत आहेत. त्यातच पाचोरा तालुक्यातील पिंपळगाव पोलीस स्टेशन हद्दीत कापूस चोरीची धक्कादायक घटना घडली. पोलिसांनी याप्रकरणी धडक कारवाई करत आरोपीला अटक केली आहे.
काय आहे संपूर्ण प्रकरण –
पिंपळगाव पोलीस स्टेशन हद्दीतील लोहारा येथील अशोक जैन यांच्या शेतातील 7 क्विंटल कापूस, 4 क्विंटल तुर व एक लोखंडी बोर्ड अज्ञात चोरट्यांनी 7 जानेवारी 2023 ते 8 जानेवारी 2023 दरम्यान चोरून नेला होता. त्याबाबत पिंपळगाव पोलीस स्टेशन 9 जानेवारीला गु. र.न.6/2023 भा. द. वि. 379 अन्वये गुन्हा करण्यात आला होता. सदर प्रकरणाचा तपास करत पोलिसांनी आरोपी अनिल सुतार याला अटक केली आहे. त्याच्याकडून 93 किलो कापूस व 60 किलो तूर हस्तगत करण्यात आला आहे.
हेही वाचा – पारोळ्यातील धक्कादायक घटना, चोरट्यांनी घर फोडून केले हजारोंचे दागिने लंपास
सदरची कारवाई पोलीस अधीक्षक एम. राजकुमार, अपर पोलीस अधीक्षक रमेश चोपडे, उपविभागीय पोलीस अधिकारी भारत काकडे यांच्या मार्गदर्शनाखाली पिंपळगाव पोलीस स्टेशनचे प्रभारी अधिकारी सहाय्यक पोलीस निरीक्षक महेंद्र वाघमारे, पोलीस उपनिरीक्षक अमोल पवार, पोलीस हवालदार रणजित पाटील, पोलीस कॉन्स्टेबल अमोल पाटील, पोलीस नाईक शिवनारायण देशमुख, पोलीस नाईक शैलेश चव्हाण, पोलीस कॉन्स्टेबल दीपक पाटील यांनी केली आहे. दरम्यान, कापूस आणि इतर शेतीमालाच्या चोरीनंतर परिसरात खळबळ उडाली आहे.
