मुंबई, 6 फेब्रुवारी : लोकप्रिय क्रिकेट समिक्षक द्वारकानाथ संझगिरी यांच्या निधनाची बातमी समोर आली आहे. द्वारकानाथ संझगिरी यांचे वयाच्या 74 व्या वर्षी दीर्घ आजाराने निधन झाले असून मुंबईच्या लीलावती रूग्णालयात त्यांनी आज दुपारी अखेरचा श्वास घेतला. द्वारकानाथ संझगिरी यांच्या पार्थिवावर उद्या दुपारी 12 वाजता शिवाजी पार्क स्मशानभूमीत अंत्यसंस्कार होणार आहेत. दरम्यान, संझगिरी यांच्या निधनानंतर आता क्रिकेटसह राजकीय वर्तुळातून त्यांना श्रद्धांजली वाहण्यात येत आहे.
द्वारकानाथ संझगिरी यांचे वयाच्या 74 व्या वर्षी निधन –
लोकप्रिय क्रिकेट समीक्षक द्वारकानाथ संझगिरी यांचे वयाच्या 74 व्या वर्षी आज दीर्घ आजाराने निधन झाले. संझगिरी यांनी मुंबईतील लीलावती रुग्णालयात अखेरचा श्वास घेतला. पेशाने सिव्हिल इंजिनीयर असलेले द्वारकानाथ संझगिरी मुंबई महापालिकेत उच्च पदावर कार्यरत होते. मात्र, क्रिकेटवर लिहिणे, बोलणे आणि मराठी साहित्यातली त्यांची रुची त्यामुळे त्यांच्यातला क्रिकेट समीक्षक घडला.
द्वारकानाथ संझगिरी यांची कारकीर्द –
द्वारकानाथ संझगिरी यांनी बृहन्मुंबई महानगरपालिकेत अभियंता म्हणून नोकरी केली. तेथून ते 2008 या वर्षी मुख्य अभियंता, पाणीपुरवठा प्रकल्प म्हणून सेवानिवृत्त झाले. त्याचबरोबर त्यांनी स्तंभलेखक, लेखक आणि सूत्रसंचालक म्हणूनही आपली एक वेगळी ओळख निर्माण केली होती. दरम्यान,1970 च्या उत्तरार्धात लेखन कारकीर्द सुरू करून त्यांच्या सुरुवातीच्या काळात त्यांनी ‘दिनांक’ आणि ‘श्री’ यासारख्या मासिकांमध्ये नियमितपणे योगदान दिले. भारताने इंग्लंडमध्ये 1983 चा विश्वचषक जिंकल्यानंतर, त्यांनी इतर काही मित्रांसह ‘एकच षटकार’ हे पाक्षिक क्रीडा मासिक सुरू केले होते, ज्यासाठी द्वारकानाथ संझगिरी यांनी कार्यकारी संपादक म्हणून काम केलं.
दरम्यान, मराठी क्रिकेट रसिकांनी त्यांच्या क्रिकेटवरच्या लेखांना आणि इतर लेखांना कायमच दाद दिली होती. क्रिकेट या खेळाबाबतची माहिती देणारा आणि त्यातली सौंदर्यस्थळं लेखणीने टिपणारा एक अवलिया माणूस काळाच्या पडद्याआड गेला असून क्रिकेट विश्व, त्यावरच्या सुरसकथा लिहिणारी लेखणी शांत झाली आहे.
हेही पाहा : IPS Dr. Maheshwar Reddy: सोशल मीडिया, क्राइम, तरुणाई; Jalgaon SP डॉ. महेश्वर रेड्डींची विशेष मुलाखत
