एरंडोल, 27 डिसेंबर : जळगाव जिल्ह्यातील एरंडोलमधून धक्कादायक बातमी समोर आली आहे. महिलेने आपल्या नऊ वर्षीय मुलीसह तिसऱ्या मजल्यावरील घरात गळफास घेऊन आत्महत्या केल्याची घटना घडली आहे. एरंडोलमधील जहांगीरपुरा भागातील महादेव मंदिर परिसरात काल दुपारी तीन वाजेच्या सुमारास ही घटना उघडकीस आली असून सपना प्रकाश माळी (वय 33) आणि केतकी माळी (वय 9) अशी या मृत माय- लेकींची नावे आहेत.
काय आहे संपुर्ण बातमी? –
मिळालेल्या माहितीनुसार, एरंडोल येथे जहांगीरपुरा भागातील महादेव मंदिर परिसरात सपना माळी ही महिला माहेरी राहत होती. असे असताना आठ वर्षांपूर्वी तिचा घटस्फोट झाला होता. दरम्यान, काल गुरुवारी दुपारी तिसऱ्या मजल्यावरील खोलीचा दरवाजा आतून लावलेला होता. यावेळी सपना हिचा भाऊ राहुल हा घरी आला असता त्याला त्याची बहीण व भाची घरी दिसले नाहीत.
हेही पाहा : आठवड्यात 6 जणांचा मृत्यू, जळगाव जिल्ह्यातील अपघात कधी थांबणार?, जिल्हाधिकारी Ayush Prasad Exclusive
अन् भावाला बहिण आढळली गळफास घेतलेल्या अवस्थेत –
राहुलने सपनाला शोधत तिसऱ्या मजल्यावर जाऊन बघितले असता खोलीचा दरवाजा आतून लावलेला होता. दरम्यान, त्याने बहिणीला आवाज दिला असता काही एक उत्तर मिळाले नाही. शेवटी दरवाजा तोडण्यात आला. त्यावेळी सपना व केतकी या दोघी गळफास घेतलेल्या स्थितीत आढळून आल्या.
आत्महत्येचे कारण अस्पष्ट –
दरम्यान, महिलेने आपल्या 9 वर्षीय मुलीसह का आत्महत्या केली याचे कारण स्पष्ट झालेले नाही. घटनास्थळी गादीवर वही आढळून आली असून त्यात सपना हिने आपल्या आत्महत्येस कोणीही जबाबदार नाही, असा उल्लेख केला आहे. याप्रकरणी एरंडोल पोलिसात अकस्मात मृत्यूची नोंद करण्यात आली आहे.
हेही पाहा : मुक्त विद्यापीठात शिक्षण, शिपाई ते आता आर्मीत मोठा अधिकारी lieutenant ashok patil khandesh interview
