ईसा तडवी, प्रतिनिधी
पाचोरा, 20 ऑगस्ट : शिवसेना उद्धव बाळासाहेब ठाकरे पक्षाच्या धडाडीच्या नेत्या वैशालीताई सुर्यवंशी या येणाऱ्या 2024 च्या विधानसभा निवडणुकीत आमदार म्हणून निवडून येतील, असा विश्वास मराठा सेवा संघाचे संस्थापक अध्यक्ष पुरुषोत्तम खेडेकर यांनी व्यक्त केला आहे. ते पाचोऱ्यात बोलत होते.
पुरूषोत्तम खेडेकर पुढे म्हणाले की, वैशालीताईंना राजकीय पार्श्वभूमी असून त्या उत्कृष्टपणे जनसेवा करू शकतात. मराठा सेवा संघ तसेच संभाजी ब्रिगेड आपणास सर्वतोपरी मदत करेल. येणाऱ्या विधानसभा निवडणुकीत वैशालीताईंसाठी आपणास अहोरात्र कष्ट घ्यावयाचे आहेत. तसेच शेवटच्या मतदारांपर्यंत जाऊन वैशालीताईंना निवडून आणण्याची जबाबदारी आपली आहे, असेही खेडेकर यांनी सांगितले.
पुरूषोत्तम खेडेकर जनसंवाद यात्रेच्या निमित्ताने जळगाव जिल्ह्याच्या दौऱ्यावर आलेले असता त्यांनी चाळीसगाव, भडगाव या ठिकाणी जनसंवाद यात्रा करून त्यांनी पाचोरा येथील निर्मल सीड्स येथे सदिच्छा भेट दिली. यावेळी वैशाली सुर्यवंशी यांनी शाल, श्रीफळ व पुष्पगुच्छ देऊन त्यांचे स्वागत केले. खेडेकर यांनी निर्मल सीडच्या विविध कार्य प्रणालीची माहिती जाणून घेतली. त्यानंतर शहरातील सर्व महापुरुषांच्या पुतळ्यांना माल्यार्पण करून टाऊन हॉल येथे सर्वांशी संवाद साधला.
वैशाली सुर्यवंशी यांनी आपल्या मनोगतात सांगितले की, मराठा सेवा संघाचे संस्थापक अध्यक्ष पुरुषोत्तम खेडेकर यांचे कार्य उल्लेखनीय असून जिजाऊ सृष्टी व जिजाऊ जन्मोत्सव साजरा करण्याचे महान कार्य आदरणीय खेडेकर साहेबांचे आहे. तसेच जिजाऊ सृष्टीसाठी पाच हजार रुपयांची देणगी देण्याचे वैशाली सुर्यवंशी यांनी जाहीर केले व 12 जानेवारी रोजी असंख्य कार्यकर्ते सिंदखेडराजा येथे जिजाऊ जन्मोत्सवसाठी येतील, असेही यावेळी त्यांनी घोषित केले.
याप्रसंगी मराठा सेवा संघाचे विभागीय कार्याध्यक्ष राम पवार, कार्याध्यक्ष अर्जुन तनपुरे, जिल्हाध्यक्ष अनिल पाटील, तसेच संभाजी ब्रिगेड व शिवसेनेचे सर्व पदाधिकारी व कार्यकर्ते मोठ्या संख्येने उपस्थित होते. कार्यक्रमाचे सूत्रसंचालन मराठा सेवा संघाचे तालुका कार्याध्यक्ष एस.ए. पाटील यांनी केले तर प्रास्ताविक व आभार विकास पाटील यांनी मानले.
