पुणे, 14 ऑक्टोबर : दहावी आणि बारावीच्या विद्यार्थ्यांसाठी एक महत्त्वाची बातमी आहे. महाराष्ट्र राज्य माध्यमिक व उच्च माध्यमिक शिक्षण मंडळान दहावी, बारावीच्या परीक्षांची तारीख घोषित केली आहे.
यानुसार इयत्ता बारावीची परीक्षा 10 फेब्रुवारी 2026 ते 18 मार्च 2026 दरम्यान, तर दहावीची परीक्षा 20 फेब्रुवारी ते 18 मार्च 2026 दरम्यान होईल. अंतिम वेळापत्रक मंडळाच्या संकेतस्थळावर जाहीर करण्यात येईल.
सध्या राज्यात एका बाजूला स्थानिक स्वराज्य संस्था निवडणुकीची रणधुमाळी सुरू होणार आहे. तर दुसरीकडे विद्यार्थ्यांसाठी एक महत्त्वाची आणि मोठी बातमी समोर आली आहे. महाराष्ट्र राज्य माध्यमिक व उच्च माध्यमिक शिक्षण मंडळाने (Pune) आगामी फेब्रुवारी-मार्च 2026 मधील दहावी आणि बारावी बोर्ड परीक्षांच्या तारखा जाहीर केल्या आहेत.
शिक्षण मंडळाने यंदाच्या वर्षी ही परीक्षा 2 आठवडे आधी घेण्याचा निर्णय घेतला आहे. हा निर्णय विद्यार्थ्यांच्या अभ्यासाचे नियोजन आणि त्यांच्यावरील ताण कमी करण्याच्या उद्देशाने घेण्यात आला आहे. त्याचा फायदा विद्यार्थ्यांना होईल असा मंडळाला विश्वास आहे.
शाळा आणि कनिष्ठ महाविद्यालय शिवाय विद्यार्थी यांना अभ्यासक्रमाचे नियोजन करण्याचे हेतू लक्षात घेता परिक्षेचे नियोजन करण्यात आले आहे. त्याच बरोबर विद्यार्थ्यांच्या मनावरील ताण कमी होण्याचे दृष्टीने फेब्रुवारी-मार्च 2026 परीक्षेच्या प्रात्यक्षिक व लेखी परीक्षेच्या तारखा जाहीर करण्यात आल्या आहेत. तर परीक्षांचे विषयनिहाय सविस्तर अंतिम वेळापत्रक स्वतंत्रपणे मंडळाच्या संकेतस्थळावर जाहीर करण्यात येणार आहे, अशी माहिती महामंडळाचे सहसचिव प्रमोद गोफणे यांनी कळवले आहे. तसे परिपत्रक त्यांच्या सहीने प्रकाशित करण्यात आले आहे.
12 वी बोर्डाची लेखी परीक्षा
10 फेब्रुवारी 2026 ते 18 मार्च 2026 (माहिती तंत्रज्ञान विषयाची ऑनलाईन परीक्षा समाविष्ट)
12 वीच्या प्रात्यक्षिक, श्रेणी आणि तोंडी परीक्षा 23 जानेवारी 2026 ते 9 फेब्रुवारी 2026 या दरम्यान होतील.
10 वी बोर्डाची लेखी परीक्षा
20 फेब्रुवारी 2026 ते 18 मार्च 2026
10 वीच्या प्रात्यक्षिक परीक्षा 2 फेब्रुवारी 2026 ते 18 फेब्रुवारी 2026 या कालावधीत होणार आहेत.
