चंद्रकांत दुसाने, विशेष प्रतिनिधी
जळगाव, 25 जून : नाशिक शिक्षक मतदारसंघाचे उमेदवार किशोर दराडे यांच्या प्रचारार्थ जळगावात मुख्यमंत्री एकनाथ शिंदे यांच्या उपस्थितीत झालेल्या बैठकीनंतर पैसे वाटप झाल्याचा व्हिडिओ ठाकरे गटाच्या उपनेत्या सुषमा अंधारे यांनी ट्विट केला होता. दरम्यान, जिल्हाधिकारी आयुष प्रसाद यांनी याप्रकरणाची दखल घेत चौकशीचे आदेश दिले आहेत. जळगावच्या जिल्हाधिकारी कार्यालयाकडून या प्रकरणाची चौकशी केली जाणार आहे.
जिल्हाधिकाऱ्यांनी दिले चौकशीचे आदेश –
नाशिक शिक्षक मतदारसंघाचे उमेदवार किशोर दराडे यांच्या प्रचारासाठी जळगावात झालेल्या बैठकीनंतर कथित पैसे वाटपाच्या प्रकाराची जळगावच्या जिल्हाधिकारी कार्यालयाकडून चौकशी केली जाणार आहे. या गंभीर प्रकारणाची दखल घेत जिल्हाधिकारी आयुष प्रसाद यांनी चौकशीचे आदेश दिले आहेत.
जळगावचे प्रांताधिकारी तसेच तहसीलदार यांना या प्रकरणाची चौकशी करण्याबाबतचे पत्र उपजिल्हाधिकारी यांनी दिले आहे. सदर प्रकरणाबाबतचा चौकशी अहवाल जिल्हाधिकारी कार्यालयाकडून मागवण्यात आला आहे. चौकशी करून जिल्हाधिकारी कार्यालयास अहवाल सादर करण्याचेही आदेश देण्यात आले आहेत.
- आदित्य लॉन्स या ठिकाणी 22 जूनला झालेल्या सभेसाठी परवानगी घेण्यात आली होती का? तसे नसल्यास नियमानुसार आवश्यक ती कार्यवाही करावी.
- सदर चित्रीकरणात दिसून येणाऱ्या लोकांची शिक्षणाधिकारी प्राथमिक/माध्यमिक यांच्यामार्फत ओळख पटवावी.
- सदर सभेदरम्यान झालेल्या चित्रीकरणाचे फुटेज तात्काळ ताब्यात घेण्यात यावेत आणि सदर चित्रीकरणाची भरारी पथकामार्फत चौकशी करावी.
- सदर चित्रीकरणात पैसे घेऊन जात असल्याबाबतचे अभिलेख जप्त करण्यात यावे आणि अभिलेख गहाळ झाल्यास भारतीय पुरावा अधिनियम 1872 अन्वये आवश्यक ती कार्यवाही करावी.
काय आहे संपुर्ण प्रकरण? –
नाशिक शिक्षक मतदारसंघाच्या निवडणुकीचे उमेदवार किशोर दराडे यांच्या प्रचारार्थ मुख्यमंत्री एकनाथ शिंदे यांच्या उपस्थितीत जळगावच्या आदित्य लॉन्स येथे बैठक पार पडली होती. मुख्यमंत्री एकनाथ शिंदे यांच्या बैठकीनंतर आदित्य लॉन्स येथे पैसे वाटप होत असल्याचा कथित व्हिडीओ व्हायरल झाला होता.
सुषमा अंधारे यांनी मुद्दा केला उपस्थित –
शिवसेना उद्धव बाळासाहेब ठाकरे पक्षाच्या नेत्या सुषमा अंधारे यांनी एकनाथ शिंदे यांच्या सभेनंतर शिक्षकांना पैसे वाटप केला गेल्याचा आरोप करत ट्विटरवर व्हिडिओ पोस्ट केला आहे. महायुतीचे उमेदवार दराडे यांच्या प्रचार्थ मुख्यमंत्री यांची जळगावातील आदित्य लॉन्स येथे सभा झाली. सभेनंतर जिल्ह्यातील आलेले प्रत्येक शाळेचे शिक्षक, कर्मचारी, मुख्याध्यापक, संस्थाचालक यांना पैसे वाटप करण्यात आले, असे त्यांनी या ट्विटमध्ये म्हटले. दरम्यान, कुठाय निवडणूक आयोग? असा प्रश्नही त्यावेळी अंधारे यांनी उपस्थित केला होता.
