जळगाव, 15 जानेवारी : जगभरातील देशांसाठी आणि उद्योगपतींसाठी महत्त्वाची असलेल्या स्वित्झर्लंडमध्ये होणाऱ्या वर्ल्ड इकॉनॉमिक फोरमच्या दावोस परिषदेसाठी यावर्षी जळगाव लोकसभा मतदारसंघाचे खासदार उन्मेश पाटील यांची निवड करण्यात आली आहे. खासदार उन्मेश पाटील यांची दावोस परिषदेसाठी निवड झाल्याबद्दल त्यांचे सर्वत्र अभिनंदन होत आहे.
काय आहे दावोस परिषद?
वर्ल्ड इकॉनॉमिक फोरमची स्थापना 1971 साली करण्यात आली होती. या संस्थेचे मुख्यालय हे स्वित्झर्लंडची राजधानी जिनेव्हामध्ये आहे. दावोसमध्ये दरवर्षी वर्ल्ड इकॉनॉमिक फोरमच्या माध्यमातून एक बैठक आयोजित करण्यात येते. या बैठकीसाठी जगभरातील बडे नेते आणि उद्योगपती आपली उपस्थिती लावतात. जागतिक व्यवसाय, राजकारण, शिक्षण आणि इतर क्षेत्रातील व्यक्ती एकत्र येऊन जागतिक विकासाला चालना देण्यासंबंधी धोरण निश्चित करतात. पाच दिवस चालणाऱ्या या बैठकीत व्यापार, राजकारण, कला, शिक्षण आणि इतर क्षेत्रातील जवळपास 2500 व्यक्ती या परिषदेत सहभागी होतात.
दावोस हे स्वित्झर्लंडमधील लँड वासर नदीच्या काठावर वसलेले सुंदर खेडं आहे. हे गाव स्विस आल्प्स पर्वताच्या प्लेसूर आणि अल्बुला या पर्वतरागांनी वेढलेले आहे. या गावाची लोकसंख्या केवळ 11 हजार इतकी आहे. युरोपमधील सर्वात उंचीवर वसलेलं हे ठिकाण आहे.
पंतप्रधान नरेंद्र मोदीही होणार सहभागी
या वर्षीची परिषद आज 16 जानेवारीपासून पाच दिवस सुरू राहणार आहे. भारताचे पंतप्रधान नरेंद्र मोदी या परिषदेला व्हिडीओ कॉन्फरन्सच्या माध्यमातून हजेरी लावणार आहेत. पंतप्रधान नरेंद्र मोदी 17 जानेवारीला संध्याकाळी चार ते साडे चार वाजण्याच्या दरम्यान दावोस परिषदेला संबोधित करणार आहेत. दरम्यान, पंतप्रधान नरेंद्र मोदींच्या व्यतिरिक्त या परिषदेला जगभरातील इतर नेतेही उपस्थिती लावणार आहेत. या वर्षीच्या परिषदेचा विषय हा ‘जागतिक परिस्थिती’ असा आहे. भारतासाठी ही परिषद अत्यंत महत्त्वाची आहे.
उत्तर व पश्चिम महाराष्ट्रातून एकमेव खासदार उन्मेश पाटील हे वर्ल्ड इकॉनॉमिक फोरम परिषदेत सहभागी होणार आहेत. त्यांच्यासोबत महाराष्ट्रातून खासदार डॉ. श्रीकांत शिंदे आणि खासदार हेमंत पाटील हेदेखील या परिषदेमध्ये सहभागी होणार आहेत.
