मुंबई : राज्यातील वाढत्या गुन्हेगारी संदर्भात आज शिवसेना उद्धव बाळासाहेब ठाकरे गटाचे प्रमुख उद्धव ठाकरे यांनी पत्रकार परिषदेत राज्याचे उपमुख्यमंत्री आणि गृहमंत्री देवेंद्र फडणवीस यांच्यावर निशाणा साधला होता. आपल्या राज्याला एक मनोरुग्ण गृहमंत्री लाभला आहे का, असा सवाल करत त्यांनी गृहमंत्री देवेंद्र फडणवीस यांच्यावर जोरदार टीका केली होती. यानंतर उद्धव ठाकरे केलेल्या टिकेला देवेंद्र फडणवीस यांनीही प्रत्युत्तर दिले आहे. उद्धवजींच्या डोक्यावर परिणाम झाला आहे, या शब्दात त्यांनी उद्धव ठाकरे यांना प्रत्युत्तर दिले आहे. नाशिक येथे माध्यमांशी बोलताना त्यांनी हे प्रत्युत्तर दिले.
नेमकं काय म्हणाले देवेंद्र फडणवीस –
राज्याचे उपमुख्यमंत्री आणि गृहमंत्री देवेंद्र फडणवीस हे आज नाशिक दौऱ्यावर होते. यावेळी त्यांनी माध्यमांशी संवाद साधताना उद्धव ठाकरेंनी केलेल्या टिकेला प्रत्युत्तर देताना म्हटले की, “पहिल्यांदा तर मला असं वाटतं की, त्यांची जी भाषा आणि त्यांचे जे शब्द आहेत, ते पाहिल्यानंतर आता माझं ठाम मत झालेलं आहे की, उद्धवजींच्या डोक्यावर परिणाम झाला आहे. त्यामुळे मी आता एवढंच बोलेन गेट वेल सून. मी त्यांच्या कुठल्याही गोष्टीवर प्रतिक्रिया देणार नाही. मी एवढीच ईश्वराला प्रार्थना करेन आणि त्यांना म्हणेन उद्धवजी गेट वेल सून”, या शब्दात देवेंद्र फडणवीस यांनी प्रतिक्रिया दिली.
काय म्हणाले होते उद्धव ठाकरे –
ठाकरे गटाचे नेते अभिषेक घोसाळकर यांची हत्या झाल्यानंतर सध्या राज्यात राजकीय वातावरण तापलेले आहे. गृहखात्यावर विरोधकांच्या वतीने जोरदा टीका करण्यात येत आहे. यावर उत्तर देताना आमच्या विरोधी पक्षाची स्थिती अशी आहे, अगदी एखाद्या गाडीखाली श्वान आला तरी ते त्याठिकाणी गृहमंत्र्याचा राजीनामा मागतील, असे वक्तव्य उपमुख्यमंत्री आणि गृहमंत्री देवेंद्र फडणवीस यांनी केले होते. फडणवीस यांच्या या विधानानंतर शिवसेना उद्धव बाळासाहेब ठाकरे गटाचे प्रमुख उद्धव ठाकरे यांनी राज्याचे उपमुख्यमंत्री आणि गृहमंत्री देवेंद्र फडणवीस यांच्यावर जोरदार टीका केली.
उद्धव ठाकरे यांनी आज मातोश्रीवर पत्रकार परिषद घेऊन महायुती सरकार आणि गृहमंत्री देवेंद्र फडणवीस यांच्यावर जोरदार टीका केली. यावेळी पत्रकार परिषदेत बोलताना उद्धव ठाकरे म्हणाले की, गेल्या काही दिवसांपासून या महाराष्ट्रात गुंडांचा जो हैदोस सुरू आहे, असा हैदोस असं नाही की यापूर्वी महाराष्ट्रात झाला नव्हता. पण ते गँगवॉर दोन गँगमधील गँगवॉर होतं. आता मात्र, सरकारमध्ये गँगवॉर आलं आहे. ज्या पद्धतीने सरकारच्या आश्रयाने ही गुंडगिरी सुरू आहे, या गुंडांचे वेळोवेळी मंत्र्यांसोबतचे फोटो प्रसिद्ध झाले आहेत, या गुड्यांना मिळणारे संरक्षण हा चितेंचा विषय आहे.
कालच देवेंद्र फडणवीस यांनी एक विधान केले. मी त्यांना कलंक बोललो, फडतूस बोललो, आता माझ्याकडे शब्द नाहीत. म्हणजे कलंक, फडतूस हे फारच सौम्य शब्द झाले. पण निर्घृण आणि असं वाटायला लागलं आहे की, यांची मानसिक तपासणी करावी की काय, आपल्या राज्याला एक मनोरुग्ण गृहमंत्री लाभला आहे का, अशीच कालची त्यांची प्रतिक्रिया होती. अत्यंत संतापनजक होती. फडणवीस जे बोलले की, उद्या एखाद्या गाडीखाली कुत्र्याचं पिल्लू, मला वाटलं त्यांनी श्वान शब्द वापरला. नुसता संस्कृत शब्द वापरला म्हणजे सुसंस्कृत होत नाही. हा सुसंस्कृत नाही, हा निर्ढावलेला, निर्घृण मनाचा, अत्यंत निर्दयी मनाचा गृहमंत्री आहे. गृहमंत्री म्हटल्यावर राज्याच्या कुत्र्याच्या, सर्व प्राण्यांच्या जीवाची जबाबदारी ही तुमच्याकडेच येते. माणसांच्या जबाबदारीची तर एक वेगळीच बाब आहे. एक हत्या होत असताना तुम्ही त्याची बरोबरी श्वानाबरोबर करता, असा सवालही त्यांनी केला.
