नाशिक, 29 सप्टेंबर : राज्याचे अन्न, नागरी पुरवठा व ग्राहक संरक्षण मंत्री छगन भुजबळ यांच्या संकल्पनेतून मुंबई नाका नाशिक येथील सावित्रीबाई फुले चौकात क्रांतीसूर्य महात्मा जोतीराव फुले व ज्ञानज्योती सावित्रीबाई फुले यांचे भव्य दिव्य स्मारक उभारण्यात आलंय. या स्मारकातील क्रांतीसूर्य महात्मा जोतीराव फुले व ज्ञानज्योती सावित्रीबाई फुले यांच्या भारतातील सर्वात मोठ्या अर्धाकृती ब्राँझ धातूच्या शिल्पाचे काल (शनिवार) लोकार्पण करण्यात आले. राज्याचे मुख्यमंत्री एकनाथ शिंदे यांच्या हस्ते व उपमुख्यमंत्री देवेंद्र फडणवीस, उपमुख्यमंत्री अजितदादा पवार, मंत्री छगन भुजबळ, पालकमंत्री दादाजी भुसे यांच्या प्रमुख उपस्थितीत हे लोकार्पण करण्यात आले.
‘ही’ आहेत पुतळ्याची वैशिष्ट्ये –
- कोकणातील कुडाळ येथील सुप्रसिद्ध मूर्तिकार बाळकृष्ण पांचाळ यांनी 11 महिन्यांच्या कालावधीत अर्धाकृती ब्राँझ धातूचे शिल्प तयार केले. या पुतळ्यांसाठी राजस्थानी कारागिरांकडून ग्रॅनाईट मार्बलमध्ये भव्य चौथरा उभारण्यात आलाय.
- आर्किटेक्ट शाम लोंढे यांनी सल्लागार म्हणून या स्मारकाच्या उभारणीची जबाबदारी पार पाडली.
- सुमारे 2,710 मीटर जागेवर हे स्मारक उभारण्यात आले आहे. यामध्ये महात्मा फुले यांचा 18 फुट उंच तर सावित्रीमाई फुले यांचा 16.5 फुट उंच पुतळा असून या दोन्ही पुतळ्यांची रुंदी प्रत्येकी 14 फूट आहे.
- महात्मा फुले यांच्या पुतळ्याचे वजन 8 टन एवढे आहे. तर क्रांतीज्योती सावित्रीबाई फुले यांच्या पुतळ्याचे वजन 7 टन एवढे आहे.
- नाशिकच्या मुंबई नाका चौकातील हे स्मारक उभारण्यासाठी तब्बल 4 कोटी 68 लाख रुपये एवढा खर्च आला आहे.
- तसेच हा पुतळा अतिशय भक्कम होण्यासाठी 8 फूट काँक्रीटचा चौथरा उभा करून त्याला ग्रेनाईट लावण्यात आले असून 30 ते 40 फूट पाईल फाऊंडेशन करण्यात आले आहे.
