भंडारा – एखादी घटना घडली म्हणून महिला सुरक्षित नाही, असं म्हणता येत नाही गुन्हेगारी वृत्ती हे प्रत्येक ठिकाणी कुठे ना कुठे असते. गुन्हेगार असल्यामुळे या घटना घडतंच असतात. त्याच्यावर कारवाई करण्याचं काम हे शासन करत असतं, या शब्दात मंत्री संजय सावकारे यांनी पुण्यातील स्वारगेट बस स्थानक येथे झालेल्या बलात्कार प्रकरणावर आपली प्रतिक्रिया दिली.
पुण्यातील स्वारगेट एसटी बस स्थानकातील शिवशाही बसमध्ये एका तरुणीवर बलात्कार झाल्याची घटना बुधवारी सकाळी समोर आल्यानंतर सर्वत्र संताप व्यक्त केला जात आहे. यानंतर याप्रकरणातील आरोपीला आज सकाळी पोलिसांनी अटक केली आहे. आरोपीच्या शोधासाठी 13 पथके तैनात करण्यात आली. आरोपी सराईत गुन्हेगार आहे. त्याच्यावर याआधी अनेक गुन्हे दाखल आहे. तसेच तो सध्या जामिनावर असल्याची माहिती पोलिसांनी दिली.
पुणे पोलिसांनी आरोपीचा शोध घेणाऱ्यास 1 लाखांचं बक्षिस जाहीर केलं. तर दुसरीकडे याप्रकरणी स्वारगेट स्थानकात तैनात असलेल्या 23 सुरक्षा रक्षकांचं निलंबन करण्यात आलं आहे. या स्वारगेट बलात्कार प्रकरणी आता मंत्री संजय सावकारे यांनी प्रतिक्रिया दिली आहे.
काय म्हणाले मंत्री संजय सावकारे –
भंडारा येथे माध्यमांशी बोलताना मंत्री संजय सावकारे म्हणाले की, एखादी घटना घडली म्हणून महिला सुरक्षित नाही, असं म्हणता येत नाही. देशात म्हणाल तर, घटना या घडतंच असतात. त्याच्यावर कारवाई सातत्याने चालू असते. महिला असो की पुरुष, प्रत्येक जण सुरक्षित राहायला हवा. महिला, पुरुष सगळे सुरूक्षित राहायला हवेत, यादृष्टीने कुठलंही शासन असो, हे प्रयत्न करत असते. गुन्हेगारी वृत्ती हे प्रत्येक ठिकाणी कुठे ना कुठे असते. गुन्हेगार असल्यामुळे या घटना घडतंच असतात. त्याच्यावर कारवाई करण्याचं काम हे शासन करत असतं, या शब्दात मंत्री संजय सावकारे यांनी आपली प्रतिक्रिया दिली.
हेही वाचा – आधी मुलाचा खून अन् नंतर बापानं केली आत्महत्या, एरंडोलमधील हादरवणारी घटना, सुसाईड नोटमध्ये नेमकं काय?
