पाचोरा, 14 ऑगस्ट : जळगाव जिल्ह्यातील भडगाव तालुक्यातील एका चिमुरडीवर लैंगिक अत्याचार करुन तिची हत्या केल्याची घटना ताजी असतानाच आता पाचोरा तालुक्यातून आणखी एक धक्कादायक घटना समोर आली आहे. एका अल्पवयीन मुलीवर अत्याचार केल्याने ती गर्भवती झाल्याचे समोर आले आहे. ही धक्कादायक घटना पाचोरा शहरातील एका भागात घडली.
काय संपूर्ण प्रकरण –
पोलिसांनी दिलेल्या माहितीनुसार, पाचोरा शहरातील एका भागात 13 वर्षीय अल्पवयीन मुलगी ही आपल्या परिवारासह वास्तव्याला आहे. तिच्या घराच्या परिसरात राहणारा तुषार वसंत गायकवाड याने पीडित मुलीवर तीन वेळा अत्याचार केला. या अत्याचारातून पिडीत मुलगी ही गर्भवती राहिली. हा प्रकार लक्षात येताच पिडीत मुलीसह तिच्या आईने पाचोरा पोलीस ठाण्यात धाव घेत, घडलेला प्रकार सांगितला.
आरोपीस पोलीस कोठडी –
या घटनेनंतर पोलिसांनी तत्काळ कारवाई करत आरोपी तुषार गायकवाड याच्याविरोधात गुन्हा दाखल करत काल रविवारी त्याला अटक केली. तसेच आरोपीला आज (14 ऑगस्ट) न्यायालयात हजर केले असता त्याला दोन दिवसांची पोलीस कोठडी सुनावण्यात आली आहे. पुढील तपास पाचोरा पोलीस करीत आहेत.
