संदीप पाटील, प्रतिनिधी
पारोळा, 6 जुलै : आमदार चिमणराव पाटील म्हणाले की, पिक विमा धारक ज्या शेतकरी बांधवांनी तक्रारारी नोंदविलेल्या असतील त्या सर्व शेतकऱ्यांना पिक विमा योजनेचा तातडीने लाभ देण्यात यावा. तसेच येत्या 15 दिवसांत शेतकऱ्यांच्या बँक खात्यात थेट अनुदान जमा करण्यात यावे. यासाठी कुठल्याही शेतकऱ्यांची इतरत्र भटकंती अथवा गैरसोय होता कामा नये, यासाठी खबरदारी घेण्यात यावे, अशा सूचना आमदार चिमणराव पाटील यांनी दिल्या.
शेतकऱ्यांच्या समस्यांबाबत बैठक –
एरंडोल-पारोळा मतदारसंघातील शेतकऱ्यांना पिक विमा व पी.एम.किसान योजनेबाबत होत असलेल्या गैरसोयीची दखल घेत आमदार चिमणराव पाटील यांनी पारोळा तालुका कृषी अधिकारी दत्तात्रय डमाळे, एरंडोल तालुका कृषी अधिकारी गंभीरे, नायब तहसीलदार एस.के. पाटील, पिक विमा तालुका प्रतिनिधी ज्ञानेश्वर रामोशी, पिक विमा एरंडोल तालुका प्रतिनिधी चेतन पाटील यांच्या उपस्थितीत आज बैठक घेतली. दरम्यान, यावेळी आमदार पाटील यांनी संबंधित अधिकाऱ्यांना महत्वाच्या सूचना दिल्या.
शेतकऱ्यांची गैरसोय दूर करण्यासाठी नियोजन करा –
तसेच पी एम किसान योजनेसंदर्भात शेतकऱ्यांना मोठी गैरसोय होतांना दिसत आहे. यासाठी सर्व आवश्यक कागदपत्रे पुरविल्यावर सुद्धा या योजनेचा बऱ्याच शेतकऱ्यांना लाभ मिळत नाही, त्यासाठी शेतकरी तहसिल कार्यालय, सी.एस.सी सेंटर येथे फेऱ्या माराव्या लागतात. म्हणून तातडीने उपाययोजना करून शेतकऱ्यांना याबाबत होत असलेली गैरसोय कशी दुर होईल, यासाठी नियोजन करण्याच्या सूचना आमदार चिमणराव पाटील यांनी दिल्या. याप्रसंगी शिवसेनेचे तालुकाप्रमुख मधुकर पाटील, शेतकरी सहकारी संघाचे अध्यक्ष विजु पाटील, आदी उपस्थित होते.
हेही वाचा : Pachora News : लाडकी बहीण योजनेसाठी जनसुविधा कार्यालय सुरू करणार; आमदार किशोर पाटील यांची माहिती
