अहमदनगर, 5 जुलै : अहमदनगर जिल्ह्यातून गुन्हेगारीची धक्कादायक बातमी समोर आलीय. पांगरमल येथे शेळ्या चोरीच्या संशयावरून जमावाकडून महिलेसह तिघांना बेदम मारहाण करण्यात आल्याची घटना काल गुरूवारी मध्यरात्री घडली. यातून एकाचा मृत्यू झाल्याची माहिती समोर आली आहे. चांगदेव चव्हाण असे मयत तरूणाचे नाव आहे.
काय आहे संपुर्ण बातमी? –
मिळालेल्या माहितीनुसार, मयत चांगदेव चव्हाण हा मूळचा छत्रपती संभाजीनगर येथील असून मागील नऊ महिन्यांपासून अहमदनगर जिल्ह्यातील पांगरमलमध्ये राहत होता. काल मध्यरात्री एक जमाव चव्हाण यांच्या घरी आला आणि गावात शेळ्या चोरी जात आहेत, असे म्हणत जमावाने चव्हाण यांना मारहाण केली. या मारहाणीत चांगदेव चव्हाण याचा मृत्यू झाला.
सरपंचासह सहा जणांना अटक –
मारहाणीत एका महिलेसह तिघे जखमी झाले असून त्यांच्यावर रूग्णालयात उपचार सुरू आहेत. दरम्यान, जखमी महिलेने दिलेल्या फिर्यादीवरून पांगरमलचे सरपंच अमोल आव्हाड तसेच सहा जणांसह इतर अनोळखी 20 ते 25 जणांविरूध्द खून , विनयभंग, अ‍ॅट्रोसिटी या कलमानुसार एमआयडीसी पोलीस ठाण्यात गुन्हा दाखल करण्यात आला आहे. दरम्यान, या घटनेचे गांभीर्य लक्षात घेऊन पोलिसांनी तातडीने करावाई करत सरपंचासह सहा जणांना अटक केली. या घटनेने परिसरात खळबळ उडाली आहे.
