ईसा तडवी, प्रतिनिधी
पाचोरा, 24 फेब्रुवारी: पाचोरा पोलीस ठाणे येथील गुन्हे शोध पथकाने बसस्थानक परिसरात घडलेल्या पाकिटमारी प्रकरणाचा यशस्वी उलगडा करत तीन महिला आरोपींना ताब्यात घेतले आहे. आरोपींकडून एकूण ३२ हजार ४०० रुपयांचा मुद्देमाल जप्त करण्यात आला असून त्यांच्याविरोधात गुन्हा दाखल करण्यात आला आहे.
काय आहे संपुर्ण बातमी? –
मिळालेल्या माहितीनुसार, दिनांक ३ नोव्हेंबर २०२५ रोजी दुपारी सव्वा तीन ते साडेतीन वाजण्याच्या सुमारास, श्रावण ताराचंद पाटील (वय ७०, रा. वडगाव खुर्द, ता. पाचोरा) हे पाचोरा बसस्थानक येथे बसमध्ये चढत असताना अज्ञात चोरट्याने त्यांच्या पॅन्टच्या खिशातून १३ हजार ४०० रुपये लंपास केले होते. या प्रकरणी ४ नोव्हेंबर २०२५ रोजी भारतीय न्याय संहिता २०२३ चे कलम ३०३ (२) अन्वये गुन्हा दाखल करण्यात आला होता.
दरम्यान, २३ फेब्रुवारी २०२५ रोजी गुन्हे प्रकटीकरण शाखेला गुप्त बातमीदारामार्फत माहिती मिळाली की, पाचोरा बसस्थानक परिसरात तीन संशयित महिला पाकिटमारीसाठी टेहळणी करत आहेत. त्यानुसार पोलिसांनी तात्काळ सापळा रचून संबंधित महिलांना ताब्यात घेतले.
चौकशीअंती आरोपींची नावे निर्मला सुनिल जोशी (वय ३३, रा. गंगापुरी, ता. जामनेर), सोनाली गणेश विधाते (वय २४, रा. हिसोडा खुर्द, ता. भोकरदन, सध्या रा. कुंभारी, ता. जामनेर) आणि उषाबाई तेजराव ऐकणार (वय ५५, रा. कुंभारी, ता. जामनेर) अशी असल्याचे निष्पन्न झाले.
तिघींनी गुन्ह्याची कबुली दिल्यानंतर पंचासमक्ष व महिला पोलीस कर्मचाऱ्यांच्या उपस्थितीत अंगझडती घेतली असता आरोपी क्रमांक १ कडून १३,५०० रुपये, आरोपी क्रमांक २ कडून ६,६०० रुपये आणि आरोपी क्रमांक ३ कडून १२,३०० रुपये असे एकूण ३२,४०० रुपये जप्त करण्यात आले. सदर गुन्ह्याचा पुढील तपास पोहेकॉ राहुल काशिनाथ शिंपी करीत आहेत.
यांनी केली कारवाई –
ही कारवाई पोलीस अधीक्षक महेश्वर रेड्डी, अप्पर पोलीस अधीक्षक कविता नेरकर, उपविभागीय पोलीस अधिकारी बापू रोहम यांच्या मार्गदर्शनाखाली पोलीस निरीक्षक राहुलकुमार पवार, पोहेकॉ राहुल काशिनाथ शिंपी, पोहेकॉ अशोक रामचंद्र हटकर, पोकॉ शरद मांगो पाटील, पोकॉ श्रीराम अनिल शिंपी, मपोकॉ प्रियंका अर्जुन आहेर, पोकॉ योगेश पाटील, पोकॉ संदिप राजपुत, मपोकॉ/महोमगार्ड सोनाली शशीकांत पाटील, महोमगार्ड कल्पना तानाजी निंबाळकर, महोमगार्ड संगीता मुरलीधर पाटील यांनी पार पाडली आहे.
