जळगाव, 11 फेब्रुवारी : जळगाव पोलिस दलामध्ये भरती प्रक्रिया राबविली जात असून, आज ११ फेब्रुवारीपासून मैदानी चाचणीला सुरुवात होत आहे. या पार्श्वभमीवर जळगाव जिल्हा पोलिस अधीक्षक डॉ. महेश्वर रेड्डी यांनी काल मंगळवार 10 फेब्रुवारी रोजी पोलीस कवायत मैदानावर जाऊन तयारीचा आढावा घेतला. यानंतर त्यांनी पत्रकारांसोबत बोलताना महत्वाची माहिती दिली.
एसपी डॉ. महेश्वर रेड्डी काय म्हणाले? –
एसपी डॉ. महेश्वर रेड्डी म्हणाले की, जळगाव जिल्हा पोलीस दलात 171 जागांसाठी 11 फेब्रुवारीपासून भरती प्रक्रियेला सुरूवात होत आहे. पोलीस शिपाईच्या 171 जागांसाठी 12 हजार अर्ज प्राप्त झाले आहेत. पुढील 9 दिवसांत उमेदवारांची शारीरिक चाचणीची प्रक्रिया पुर्ण करण्यात येणार आहे. यासाठी संपुर्ण व्यवस्था पोलीस कवायत मैदानावर करण्यात आली आहे. भरती प्रक्रियेसाठी कर्तव्यवावर असलेले अधिकारी-कर्मचारी तसेच उमेदवारांना मोबाईलचा वापर करण्यास मनाई राहणार आहे.
View this post on Instagram
पोलीस दलात कार्यरत असलेले अधिकारी-कर्मचारी यांची पाल्य जर भरती प्रक्रियेत सहभागी असतील तर त्यांना त्याठिकाणी ड्युटी लावण्यात आली नसल्याचेही डॉ. रेड्डी यांनी नमूद केले. दरम्यान, मैदानी चाचणीमध्ये उमेदवारांची उंची व छाती मोजणीसाठी उपकरणाचा वापर केला जाणार आहे. त्यातून अचूक नोंद होणार असल्याचेही त्यांनी सांगितले.
१७१ जागांची भरती प्रक्रिया –
जळगाव जिल्ह्यात पोलिस शिपाई पदाच्या १७१ रिक्त जागांसाठी भरती प्रक्रिया सुरू झाली आहे. या भरतीअंतर्गत ११ ते २२ फेब्रुवारीदरम्यान मैदानी चाचणी आयोजित करण्यात आली आहे. ११ फेब्रुवारी रोजी पहिल्या दिवशी ५०० पुरुष उमेदवारांची चाचणी घेतली जाणार असून त्यानंतर दररोज एक हजार उमेदवारांना हजर राहण्याचे आवाहन करण्यात आले आहे. शेवटचे दोन दिवस, म्हणजेच २१ व २२ फेब्रुवारी रोजी महिला उमेदवारांची मैदानी चाचणी होणार आहे. दरम्यान, १५, १६ आणि १९ फेब्रुवारी रोजी चाचणीस सुटी राहणार आहे.
