धरणगाव : गेल्या काही दिवसात अनैतिक संबंधातून हत्या, आत्महत्या तसेच बलात्काराच्या घटनांमध्ये वाढ होत असल्याचे दिसून येत आहे. यातच आता आणखी एक धक्कादायक घटना समोर आली आहे. अल्पवयीन युवतीवर होणाऱ्या पतीने बलात्कार केल्याची घटना समोर आली आहे. विवाह होण्यापूर्वीच आपल्या होणाऱ्या पत्नीशी ती अल्पवयीन असताना शारिरीक संबंध ठेवल्याने तसेच ती गर्भवती राहिली. या प्रकरणी युवकावर बलात्काराचा गुन्हा दाखल करण्यात आला आहे.
काय आहे संपूर्ण घटना –
जळगाव जिल्ह्यातील धरणगाव तालुक्यातील एका गावातील अल्पवयीन युवतीचे एका युवकासोबत लग्न जुळले होते. मात्र, विवाह होण्याआधी युवकाने अल्पवयीन युवतीशी शारीरिक संबंध ठेवले. यातून ही अल्पवयीन युवती गर्भवती राहिली होती. याप्रकरणी धरणगाव पोलिसात भारतीय न्याय संहिता कलम 64सह बालकांचे लैंगिक अपराधापासून संरक्षण अधिनियम कलम-4, 8, 12प्रमाणे बलात्काराचा गुन्हा दाखल करण्यात आला होता.
किशोर रामलाल मालचे असे आरोपी तरुणाचे नाव आहे. याप्रकरणी धरणगाव पोलिसांनी आरोपी किशोर रामलाल मालचे याला अटक केली असून त्याला न्यायालयात हजर केले असता न्यायालयीन कोठडी सुनावण्यात आली आहे. याप्रकरणी पोलीस निरीक्षक पवन देसले यांच्या मार्गदर्शनाखाली पोलीस उपनिरीक्षक संतोष पवार हे पुढील तपास करीत आहेत.
