धरणगाव, 17 जानेवारी : नामांतराच्या लढ्यात मराठा समाजाचे विलास ढाणे यांचे बलिदान कदापी विसरता येणार नाही. समतेची शिकवण अंगीकारा म्हणजे विषमतेचे मूळ आपोआप संपेल, असे प्रतिपादन व्याख्याते सतीश शिंदे यांनी केले. डॉ. बाबासाहेब आंबेडकर मराठवाडा विद्यापीठ नामविस्तार दिनाच्या औचित्यावर धरणगाव तालुक्यातील साकरे येथे प्रबोधनात्मक व्याख्यानाचे आयोजन करण्यात आले होते. यावेळी ते बोलत होते.
सतीश शिंदे यांच्यासोबतच या कार्यक्रमाला अॅड. रवींद्र गजरे हेसुद्धा उपस्थित होते. यावेळी कार्यक्रमाचे दुसरे व्याख्याते अॅड. रवींद्र गजरे यांनीही इतिहासासंदर्भात अनेक दाखले दिले. छत्रपती शिवराय ते भीमराय यांच्या विचारांचा वसा आम्हाला आजही प्रेरणादायी आहे. महापुरुषांचे विचार समानता प्रदान करणारे आहेत, असे प्रतिपादन अॅड. रवींद्र गजरे यांनी केले.
तर या कार्यक्रमाला अध्यक्ष म्हणून पोलीस पाटील घनश्याम पाटील आणि प्रमुख पाहुणे म्हणून ग्रामपंचायत सदस्य भानुदास पाटील, प्रवीण बाविस्कर उपस्थित. यावेळी मान्यवरांच्या हस्ते महापुरुषांच्या प्रतिमेस पुष्पहार अर्पण करण्यात आले. कार्यक्रमा प्रसंगी रोहिदास सोनवणे, पोलीस पाटील घनश्याम पाटील यांनी सतीश शिंदे, ऍड रवींद्र गजरे या दोघंही व्याख्यात्यांचा पुष्पगुच्छ देऊन सत्कार केला.
हेही वाचा – एरंडोल : भरधाव मर्सिडीजची धडक, भीषण अपघातात दोन तरुणांचा जागीच मृत्यू
दरम्यान या कार्यक्रमाला भानुदास पाटील, रोहिदास सोनवणे, राष्ट्रीय मुस्लिम मोर्चा जिल्हा कार्याध्यक्ष सिराज कुरेशी, निलेश पवार, गौतम गजरे, गुलाब सोनावणे, श्रावण पानपाटील आदी उपस्थित होते. या कार्यक्रमाचे सूत्रसंचालन आणि आभार धनराज सोनवणे यांनी केले. यावेळी प्रबोधन व्याख्यानाला गावातील नागरिक मोठ्या संख्येने उपस्थित होते.
