चंद्रकांत दुसाने, विशेष प्रतिनिधी
जामनेर (जळगाव), 15 मे : जळगाव जिल्ह्यातील जामनेर तालुक्यातून धक्कादायक घटना समोर आली आहे. भारतरत्न तथा माजी क्रिकेटपटू सचिन तेंडुलकरच्या घरी काम करणाऱ्या एसआरपीएफ जवानाने जामनेर येथील राहत्या घरी गोळी झाडून आत्महत्या केल्याची घटना घडली. प्रकाश कापडे (वय 39 वर्ष) असे आत्महत्या केलेल्या सुरक्षा रक्षकाचे नाव आहे. याबाबतची माहिती जामनेर पोलिसांनी सुवर्ण खान्देश लाईव्हसोबत बोलताना दिली.
काय आहे संपूर्ण बातमी?-
प्रकाश कापडे हे गेल्या काही वर्षांपासून राज्य राखीव पोलीस दलात कार्यरत होते. माजी क्रिकेटपटू सचिन तेंडुलकरकडे यांच्या घरी सध्या ते सुरक्षा रक्षकाचे काम करत होते. पण प्रकाश कापडे आठ दिवसांपासून मुंबई येथून जामनेर येथे आपल्या गणपती नगर येथील घरी आले होते. दरम्यान, काल रात्री 1.30 वाजेच्या सुमारास घरातील सर्वजण झोपले असताना, त्यांनी स्वतःच्या डोक्यात बंदुकीची गोळी मारून आत्महत्या केली. कापडे यांच्या आत्महत्येचे कारण कळू शकले नसून या प्रकरणाचा पुढील तपास पोलीस करत आहेत.
परिसरात खळबळ –
प्रकाश कापडे यांनी आत्महत्या केल्याने गोळीबाराचा आवाज आल्यानंतर घरातील लोक धावत आले. दरम्यान, कापडे त्यांच्या कुटुंबियांना रक्ताच्या थारोळ्यात पडलेले आढळले. यानंतर पोलिसांनी घटनास्थळी दाखल झाले. घटनेचा पंचनामा केला असून पुढील तपासणीसाठी मृतदेह जिल्हा रुग्णालयात पाठविण्यात आला आहे. दरम्यान, या आत्महत्येचे कारण अस्पष्ट आहे. जामनेर पोलीस पुढील तपास करत आहेत.
हेही वाचा : Karan Pawar Interview : शिवसेना (उबाठा) उमेदवार करण पवार यांच्यासोबत विशेष संवाद.
