चंद्रकांत दुसाने, विशेष प्रतिनिधी
मुंबई, 19 मे : राज्यात आतापर्यंत लोकसभा निवडणुकीचे चार टप्पे पार पडले असून आज, 20 मे रोजी पाचवा टप्पा पार पडणार आहे. यामध्ये राज्यातील 13 लोकसभा मतदारसंघांमध्ये मतदान प्रक्रिया पार पडत आहे. या पार्श्वभूमीवर अनेक दिग्गज नेत्यांचे भविष्य पणाला लागले आहे. दरम्यान, या पाचव्या टप्प्यात मतदार कुणाला कौल देणार, याकडे सर्वांचे लक्ष लागले आहे.
पाचव्या टप्प्यात या मतदारसंघांचा समावेश –
लोकसभा निवडणुकीसाठी पाचव्या टप्प्यात धुळे, दिंडोरी, नाशिक, कल्याण, पालघर, भिवंडी, ठाणे, मुंबई उत्तर, मुंबई उत्तर पूर्व, मुंबई उत्तर पश्चिम, मुंबई उत्तर मध्य, मुंबई दक्षिण मध्य आणि मुंबई दक्षिण या मतदारसंघात मतदान होणार आहे. या सर्व मतदारसंघांत महायुती आणि महाविकास आघाडीच्या उमेदवारांच्या प्रचारासाठी मोठ्या प्रमाणात जाहीरसभा पार पडल्या. दरम्यान, या प्रत्येक मतदारंसघात चुरशीची लढत होणार असल्याने सर्वांचे लक्ष या मतदारसंघांकडे लागले आहे.
लोकसभा निवडणुकीतील पाचव्या टप्प्यात मुंबईतील सहाही लोकसभा मतदारसंघांचा समावेश असल्याने महायुती वा महाविकास आघाडीसाठी ते महत्वाचे मानले जात आहे. मागील लोकसभा निवडणुकीत भाजप-सेना युती असल्याने या ठिकाणी शिवसेनेचे (तत्कालीन) वर्चस्व राहिले आहे. दरम्यान, शिवसेनेत उभी फुट पडल्यानंतर यंदाच्या लोकसभा निवडणुकीत ठाकरे गट आणि शिंदे गट असा संघर्ष पाहायला मिळणार आहे.
