चोपडा, 20 जानेवारी : चोपडा तालुक्यातील कुसुंबा येथून धक्कादायक घटना समोर आली आहे. महिलेला मूलबाळ होत नसल्याने तिच्या सासरच्यांकडून तिचा छळ केल्याच्या कारणावरून कुसुंबा येथील महिलेने आत्महत्या केल्याची घटना चोपडा तालुक्यातील कुसुंबा या गावात घडली. वर्षा गणेश सुर्यवंशी असे आत्महत्या केलेल्या महिलेचे नाव आहे. (Crime News)
काय आहे संपूर्ण प्रकरण? –
चोपडा तालुक्यातील कुसुंबा येथील वर्षा गणेश सुर्यवंशी (वय 24) या महिलेला मूलबाळ होत नव्हते. त्यामुळे सासरच्यांनी छळ केल्याच्या कारणावरून महिलेने आत्महत्या केल्याचे फिर्यादीत म्हटले आहे. आत्महत्येस प्रवृत्त केल्याप्रकरणी चोपडा ग्रामीण पोलिसांत गुन्हा दाखल झाला आहे.
सासरच्या जाचाला कंटाळली –
फिर्यादीत दिलेल्या माहितीनुसार, कुसुंबा येथील वर्षा हिचे 3 वर्षांपूर्वी लग्न झाले होते. तिला मूलबाळ होत नसल्याने घरात वाद होत होते. यात 18 तारखेलाही पती-पत्नी आणि सासू यांच्यात वाद झाला. या जाचाला कंटाळून वर्षाने विषारी द्रव प्राशन करून आपली जीवनयात्रा संपविली.
आत्महत्येस प्रवृत्त केल्याप्रकरणी गुन्हा दाखल –
सुनील मांगू पाटील (47) यांच्या फिर्यादीवरून पती गणेश उर्फ परेश संजय सूर्यवंशी (वय 29), सासरे संजय आत्माराम सूर्यवंशी (वय 53), सासू रेखाबाई संजय सूर्यवंशी (वय 48, तिघे रा. कुसुंबा), नणंद माधुरी पाटील (32, रा. करजगाव, ता. चाळीसगाव) यांच्याविरूद्ध गुन्हा दाखल करण्यात आला आहे.
पती व सासरा अटकेत –
मयत वर्षा हिच्यावर 19 रोजी उपजिल्हा रूग्णालयात शवविच्छेदन करण्यात येऊन कुसुंबा येथे अंत्यसंस्कार करण्यात आले. याप्रकरणी पती, सासरा यांना अटक करण्यात आली आहे. त्यांना न्यायालयात हजर केले असता, तीन दिवसांची पोलिस कोठडी सुनावण्यात आली आहे. तर नणंद आणि सासू फरार असल्याची माहिती सहायक पोलिस उपनिरिक्षक शेषराव नितवरे यांनी दिली.
