मुंबई, 18 जुलै: वाढत्या इंधन, देखभाल व कर्मचाऱ्यांच्या खर्चाच्या पार्श्वभूमीवर महाराष्ट्र राज्य मार्ग परिवहन महामंडळाच्या (एसटी) भाड्यात १३.५६ टक्के वाढ करण्यास राज्य परिवहन प्राधिकरणाने मंजुरी दिली आहे. या निर्णयामुळे यापूर्वी साध्या बसांसाठी लागू करण्यात आलेली १० टक्के हंगामी भाडेवाढ रद्द करण्यात येणार आहे.
राज्य परिवहन प्राधिकरणाकडून भाडेवाढीस मान्यता –
एसटी महामंडळाने सादर केलेल्या प्रस्तावानुसार, अखाती देशांतील युद्धजन्य परिस्थितीमुळे डिझेलच्या किमतीत झालेली वाढ, एसटी कर्मचाऱ्यांच्या विविध भत्त्यांतील वाढ, तसेच वाहनांचे सुटे भाग, टायर आणि देखभाल खर्चात झालेली लक्षणीय वाढ यामुळे महामंडळावर मोठा आर्थिक ताण निर्माण झाला आहे. या सर्व बाबींचा विचार करून राज्य परिवहन प्राधिकरणाने भाडेवाढीस मान्यता दिली.
महामंडळाने स्पष्ट केले आहे की, आर्थिक शाश्वतता राखत राज्यातील लाखो प्रवाशांना सुरक्षित, दर्जेदार आणि अखंड सेवा देण्यासाठी हा निर्णय अपरिहार्य ठरला आहे. वाढत्या खर्चाचा भार सहन करत एसटी सेवा सुरू ठेवण्यासाठी भाडेवाढ आवश्यक असल्याचेही महामंडळाने म्हटले आहे.
या भाडेवाढीमुळे एसटीची सेवा अधिक सक्षम आणि टिकाऊ होण्यास मदत होणार असून, प्रवाशांच्या सुरक्षित व विश्वासार्ह प्रवासासाठी आवश्यक सुविधा आणि गुणवत्तापूर्ण सेवा कायम राखणे शक्य होईल, असा विश्वास महामंडळाने व्यक्त केला आहे.
हेही वाचा: VIDEO | जळगाव एलसीबीची मोठी कारवाई! धावत्या लक्झरी बसमधील २५ लाखांची चोरी उघड; चौघांना अटक
