धुळे – धुळे जिल्ह्यातून एक धक्कादायक घटना समोर आली आहे. धुळे शहरातून 4 बांग्लादेशी नागरिकांना अटक करण्यात आली आहे. धुळे स्थानिक गुन्हे अन्वेषण आणि एटीएसच्या पथकाने ही कारवाई केली आहे. ही घटना समोर आल्यानंतर परिसरात एकच खळबळ उडाली आहे.
काय आहे संपूर्ण घटना –
मिळालेल्या माहितीनुसार, धुळे शहरातील हॉटेल न्यू शेरे पंजाब येथून चार बांगलादेशींना अटक करण्यात आली आहे. गेल्या दोन दिवसांपूर्वी धुळे शहरात ब्लँकेट विकण्याच्या बहाण्याने हे बांग्लादेशी याठिकाणी आल्याची माहिती पोलिसांनी दिली.
शहरातील न्यु शेरे पंजाब लॉजमधील रूम नं.122 मध्ये हे चार बांग्लादेशी नागरिक वैध कागदपत्राशिवाय बेकायदेशिररित्या राहत असल्याची गोपनीय माहिती पोलिसांना मिळाली होती. यानंतर मिळालेल्या माहितीच्या आधारे सापळा रचत स्थानिक गुन्हे शाखेची टीम न्यू शेरे पंजाब लॉज येथे पोहोचली. यानंतर पोलिसांनी येथून या 4 बांग्लादेशी नागरिकांना अटक केली.
महंमद मेहताब बिलाल शेख (48), शिल्पी बेगम महंमद बेताब शेख (43, मुळ रा. चरकंदी पो. निलुखी पोलीस ठाणे सिपचर जि. महिदीपुर, बांग्लादेश), ब्युटी बेगम पोलस शेख, (45, मुळ रा. बेहेनातोला पोलीस ठाणे सिपचर, जि. महिदीपुर बांग्लादेश) आणि रिपा रफीक शेख (30 वर्ष, मुळ रा. श्रीकृष्णादी पो. कबीरस्पुर पोलीस ठाणे, राजुर जि. महिदीपुर बांग्लादेश) अशी अटक करण्यात आलेल्या बांग्लादेशी नागरिकांची नावे आहेत.
Mla Ram Bhadane : ’32 वर्षांचा तरुण पहिल्यांदाच विधानसभेत’, धुळे ग्रामीणचे आमदार राम भदाणेंची मुलाखत
या सर्वांची पोलिसांनी चौकशी केली असता यामध्ये महंमद शेख व शिल्पी बेगम हे पती-पत्नी असुन, दोन महिला बहिणी असल्याचे सांगून चारही बांग्लादेशी नागरिक असल्याचे त्यांनी सांगितले. बेरोजगारीला कंटाळून कोणतेही वैध प्रवासी कागदपत्राशिवाय घुसखोरीच्या मार्गाने त्यांनी भारतात प्रवेश केला. त्यानंतर न्यू शेरे पंजाब येथे राहुन धुळे शहरात कामधंदा आणि घराच्या शोधात हे नागरिक होते, अशी माहिती पोलिसांनी दिली.
दरम्यान, पोलिसांनी त्यांच्या ताब्यातून 40 हजार रुपये किंमतीचे चार मोबाईल ताब्यात घेतले आहेत. तर त्यांच्याकडे बांग्लादेशी असल्याचे कोणतेही वैध पासपोर्ट आणि व्हिसा आढळून आले नाहीत. ते नातेवाईकांशी बोलण्याकरिता आयएमओ हे अ‍ॅप वापरत असल्याचे पोलीस तपासात समोर आले आहे. या सर्वांना पोलिसांनी अटक केली असून पोलीस याप्रकरणी पुढील तपास करत आहेत.
