नवी दिल्ली, 4 मार्च: राज्यसभेच्या निवडणुकीसाठी भाजपने महाराष्ट्रातील उमेदवारांची यादी जाहीर केली असून राज्यसभेच्या द्विवार्षिक निवडणुकीसाठी चार उमेदवारांच्या नावांना अंतिम मंजुरी देण्यात आली. यामध्ये भाजपचे राष्ट्रीय सरचिटणीस विनोद तावडे, रिपाइं पक्षाचे नेते रामदास आठवले, माया इवनाते आणि राम वडकुते यांचा समावेश आहे.
राज्यसभेसाठी भाजपचे 4 उमेदवार –
भाजपचे राष्ट्रीय सरचिटणीस विनोद तावडे यांचे या निमित्ताने संसदेत पुनरागमन होत असून त्यांच्या संघटनात्मक कौशल्याचा पक्षाला फायदा होण्याची शक्यता आहे. तसेच केंद्रीय मंत्री आणि आरपीआय (आठवले) गटाचे प्रमुख रामदास आठवले यांना भाजपने आपल्या कोट्यातून पुन्हा एकदा संधी दिली आहे.
दरम्यान, यावेळी भाजपकडून पुन्हा एकदा धक्कातंत्राचा अवलंब करण्यात आला असून चार उमेदवारांच्या यादीत दोन नव्या चेहऱ्यांना संधी देण्यात आली आहे. यामध्ये नागपूरच्या माजी महापौर माया चिंतामण इवनाते तसेच हिंगोलीतील धनगर समाजाचे नेते आणि माजी आमदार रामराव वडकुते यांचा समावेश आहे.
वेगवेगळ्या समाजघटकांना प्रतिनिधित्व देण्याचा प्रयत्न –
भाजपने या निवडणुकीत वेगवेगळ्या समाजघटकांना प्रतिनिधित्व देण्याचा प्रयत्न केला आहे. मराठा, आदिवासी, ओबीसी आणि मागासवर्गीय समाजाला चारही उमेदवारांच्या माध्यमातून संधी देण्यात आली आहे. तसेच, प्रादेशिक समतोल राखण्याकडेही पक्षाने लक्ष दिले आहे. विदर्भ, मराठवाडा आणि कोकण या भागांतील उमेदवारांना संधी देऊन सर्व भागांचा समावेश करण्याचा प्रयत्न करण्यात आला आहे.
राज्यसभा निवडणुकीचा कार्यक्रम –
- 5 मार्च – उमेदवारी अर्ज दाखल करण्याची अंतिम मुदत
- 6 मार्च – अर्जांची छाननी
- 9 मार्च – उमेदवारी मागे घेण्याची शेवटची तारीख
- 16 मार्च – सकाळी 9 ते सायं. 4 मतदान; सायं. 5 नंतर मतमोजणी
