मुंबई – भाजप विधीमंडळ पक्षाचे नेते देवेंद्र फडणवीस हे राज्याचे मुख्यमंत्री म्हणून आज शपथ घेणार आहेत. तसेच अजित पवार हे उपमुख्यमंत्री म्हणून शपथ घेणार आहेत. मात्र, एकनाथ शिंदे हे देवेंद्र फडणवीसांच्या सरकारमध्ये सहभागी होतील की नाही, याबाबत अद्यापही स्पष्टता नाही. याबाबत थोड्याच वेळात एकनाथ शिंदे भूमिका स्पष्ट करतील, अशी माहिती शिवसेनेचे ज्येष्ठ नेते उदय सामंत यांनी दिली.
पत्रकार परिषेदत उदय सामंत काय म्हणाले –
उपमुख्यमंत्रीपदापेक्षा संघटक म्हणून काम करावे, अशी एकनाथ शिंदेंची इच्छा होती. हे कोणतेही दबावतंत्र नाही. पुढच्या एका तासात एकनाथ शिंदे हे निर्णय घेतील आणि भूमिका जाहीर करतील, अशी माहिती त्यांनी दिली.
शिंदे सोडून कोणतेही मंत्री शपथ घेण्यास तयार नाहीत. तुम्हीच उपमुख्यमंत्री व्हावेत, अशी इच्छा आम्ही त्यांच्याकडे व्यक्त केली आहे, असे ते म्हणाले. शिंदे सकारात्मक भूमिका जाहीर करतील, असेही त्यांनी सांगितले.
आमचे राजकीय भविष्य शिंदे साहेबांच्या हातात आहे. शिंदे साहेब नसतील, तर आम्हीही शपथ घेणार नाहीत. आमच्या मागणीच्या विचार एकनाथ शिंदे करतील, असे ते म्हणाले. शिंदे साहेबांनी उपमुख्यमंत्री व्हावे, ही पक्षाची गरज असल्याचेही त्यांनी सांगितले.
काल काय म्हणाले होते एकनाथ शिंदे?
महायुतीमध्ये खातेवाटपावरुन नाराजीनाट्य सुरू असल्याची चर्चा आहे. काल महायुतीच्या नेत्यांनी राज्यपालांकडे सत्तास्थापनेचा दावा केला. यानंतर देवेंद्र फडणवीस, अजित पवार आणि एकनाथ शिंदे या तिघांनी माध्यमांशी संवाद साधला. यावेळी एकनाथ शिंदे यांना ते देवेंद्र फडणवीसांच्या कॅबिनेटमध्ये सहभागी होणार का, या प्रश्नावर ते म्हणाले की, संध्याकाळी आम्ही तुम्हाला याबाबत सांगतो. थोडं थांबा. देवेंद्रजी माझ्याकडे आले, तो त्यांच्या मनाचा मोठेपणा आहे. मी त्यांना धन्यवाद देतो. आमच्या सर्व महायुतीच्या आमदारांचाही जो आग्रह आहे, सर्वांना मी धन्यवाद देतो. सगळ्यांचा आदर करतो. त्यामुळे तुम्हाला सांगू.
