मुंबई, 11 फेब्रुवारी : मुंबई महानगरपालिकेच्या महापौरपदाबाबत गेल्या काही दिवसांपासून उत्सुकता शिगेला पोहोचली होती. 7 फेब्रुवारी 2026 रोजी महापौर आणि उपमहापौर पदासाठी अर्ज दाखल करण्याची प्रक्रिया पार पडली. भाजपकडून रितू तावडे तर शिवसेना (शिंदे गट) कडून संजय घाडी यांनी उमेदवारी अर्ज सादर केला होता. विरोधकांनी उमेदवार न दिल्याने ही निवडणूक बिनविरोध झाली. त्यानंतर 11 फेब्रुवारी रोजी अधिकृत घोषणाही करण्यात आली.
मुख्यमंत्री-उपमुख्यमंत्र्यांची उपस्थिती –
मुंबई महानगरपालिका भवन येथे आज नवनिर्वाचित महापौर रितू तावडे आणि उपमहापौर संजय घाडी यांच्या पदग्रहण सोहळ्याचे आयोजन करण्यात आले. राज्याचे मुख्यमंत्री देवेंद्र फडणवीस आणि उपमुख्यमंत्री एकनाथ शिंदे यांनी उपस्थित राहून नव्या पदाधिकाऱ्यांचे अभिनंदन केले व शुभेच्छा दिल्या.
यावेळी विधानसभा अध्यक्ष ॲड. राहुल नार्वेकर, भाजप मुंबई अध्यक्ष अमित साटम, शिवसेना सरचिटणीस राहुल शेवाळे, आमदार चित्रा वाघ, आमदार संजय उपाध्याय तसेच महायुतीचे पदाधिकारी आणि कार्यकर्ते मोठ्या संख्येने उपस्थित होते.
महापौर-उपमहापौरांनी हाती घेतली धुरा –
भाजपच्या रितू तावडे यांनी मुंबईच्या महापौरपदाची सूत्रे स्वीकारली असून शिवसेना (शिंदे गट) चे संजय घाडी यांनी उपमहापौरपदाची जबाबदारी स्वीकारली आहे. महापौरपदासाठी भाजपमध्ये रितू तावडे आणि शीतल गंभीर यांच्या नावांची चर्चा होती; मात्र अंतिमतः तावडे यांच्या नावावर शिक्कामोर्तब झाले.
View this post on Instagram
मुंबईत भाजपचा पहिला महापौर –
रितू तावडे या मुंबईतील भाजपच्या पहिल्या महिला महापौर ठरल्या आहेत. मागील 44 वर्षांनंतर मुंबईत भाजपच्या त्या पहिल्याच महापौर झाल्या आहेत. महापालिका निवडणुकीत भाजपने सर्वाधिक जागा जिंकल्या होत्या. महायुतीला स्पष्ट बहुमत मिळाल्याने महापौरपदावर भाजपचा उमेदवार विराजमान होण्याचा मार्ग सुकर झाला होता.
सत्तारोहणाचा पहिलाच दिवस ठरला वादळी –
दरम्यान, पदग्रहण सोहळ्यानंतर सभागृहात भाजप, काँग्रेस आणि ठाकरे गटामध्ये तीव्र वाद रंगला. बसण्यासाठी जागा न दिल्याचा आरोप करत काँग्रेस नगरसेवकांनी व्यासपीठासमोर ठिय्या आंदोलन केले. महापौरांचे भाषण सुरू असताना “जागा द्या” अशा घोषणा देण्यात आल्या. काही महिला नगरसेविका जमिनीवर बसल्याचे चित्र पाहायला मिळाले. “महिला महापौर, महिलांचाच अपमान” असा आरोप करत काँग्रेसने सभागृहातून वॉकआऊट केला. त्यामुळे भाजपच्या सत्तारोहणाचा पहिलाच दिवस गदारोळात गेला.
कोण आहेत रितू तावडे? –
रितू तावडे या विद्याविहारच्या रहिवासी असून त्या भाजपच्या ज्येष्ठ नगरसेविका आहेत. 2012 मध्ये प्रभाग क्रमांक 127 मधून त्यांनी पहिला विजय मिळवला. 2017 मध्ये घाटकोपरमधील प्रभाग क्रमांक 121 मधून त्या निवडून आल्या. 2025 च्या निवडणुकीत प्रभाग क्रमांक 132 मधून त्यांनी पुन्हा विजय मिळवला. त्यांनी मुंबई महापालिकेच्या शिक्षण समितीच्या अध्यक्षपदाची जबाबदारीही सांभाळली आहे.
उपमहापौर संजय घाडी यांची पार्श्वभूमी –
शिवसेना (शिंदे गट) कडून उपमहापौरपदाची संधी संजय घाडी यांना मिळाली आहे. ते 2017 ते 2022 या कालावधीत शिवसेना नगरसेवक होते. सलग दुसऱ्यांदा ते निवडून आले आहेत. त्यांच्या पत्नी संजना घाडी या शिवसेना उपनेत्या व प्रवक्त्या असून मुलगा सुयश युवासेना विधानसभा समन्वयक म्हणून कार्यरत आहे.
हेही वाचा : पोलीस भरती दरम्यान तरुणाचा मृत्यू, बीडमध्ये मैदानावर नेमकं काय घडलं?
