नवी दिल्ली, 19 फेब्रुवारी: मुस्लिम समाजासाठी अत्यंत पवित्र मानला जाणारा रमजान महिना आजपासून (१८ फेब्रुवारी) सुरू झाला आहे. इस्लामिक पंचांगातील नववा महिना असलेला हा काळ अल्लाहची इबादत, आत्मसंयम आणि प्रार्थनेसाठी अर्पण केला जातो. या महिन्यात मुस्लिम बांधव सूर्योदयापासून सूर्यास्तापर्यंत अन्न-पाणी त्यागून रोजा पाळतात.
रमजानचे धार्मिक महत्त्व –
Ramadan हा केवळ उपवासाचा काळ नसून आध्यात्मिक शुद्धीकरण आणि आत्मपरीक्षणाचा महिना मानला जातो. या दिवसांत पाच वेळा नमाज अदा करणे, कुरआन पठण, संयम पाळणे आणि दानधर्म (जकात) करण्याला विशेष महत्त्व असते. मद्यपान, धूम्रपान व इतर वाईट सवयींपासून दूर राहून शिस्तबद्ध जीवन जगण्यावर भर दिला जातो.
सेहरी आणि इफ्तारचे महत्त्व –
रमजानमध्ये सूर्योदयापूर्वी घेतल्या जाणाऱ्या भोजनाला ‘सेहरी’ म्हटले जाते. दिवसभर उपवास पाळण्यासाठी शरीराला आवश्यक ऊर्जा याच वेळी मिळते. तर सूर्यास्तानंतर रोजा सोडण्याला ‘इफ्तार’ म्हणतात. इफ्तारवेळी खजूर खाऊन उपवास सोडण्याची परंपरा असून कुटुंबीय व मित्रपरिवार एकत्र येऊन नमाज व भोजन करतात.
रमजान २०२६: सुरुवातीच्या दिवसांचे वेळापत्रक –
रमजानच्या प्रारंभीच्या दिवसांत सेहरी व इफ्तारच्या वेळा पुढीलप्रमाणे असतील:
- १९ फेब्रुवारी २०२६: सेहरी – सकाळी ५:३६, इफ्तार – सायं. ६:१५
- २० फेब्रुवारी २०२६: सेहरी – ५:३५, इफ्तार – ६:१६
- २१ फेब्रुवारी २०२६: सेहरी – ५:३५, इफ्तार – ६:१७
- २२ फेब्रुवारी २०२६: सेहरी – ५:३४, इफ्तार – ६:१७
- २३ फेब्रुवारी २०२६: सेहरी – ५:३३, इफ्तार – ६:१८
रमजान महिन्यात उपासना, संयम आणि परस्पर सहकार्याच्या भावनेतून समाजात सौहार्द व एकात्मतेचा संदेश दिला जातो.
हेही वाचा: Shiv Jayanti 2026: देशभरात शिवजयंतीचा उत्साह, किल्ले शिवनेरीवर शिवभक्तांची मांदियाळी
