पाचोरा, 17 एप्रिल: पाचोरा पोलिसांनी तत्परता दाखवत अवघ्या तीन तासांत दोन चोरीचे गुन्हे उघडकीस आणत चोरीचा संपूर्ण मुद्देमाल हस्तगत केला आहे. या कारवाईमुळे परिसरातील नागरिकांकडून पोलिसांचे कौतुक होत आहे.
नेमकं प्रकरण काय? –
मिळालेल्या माहितीनुसार, नय्युम जहांगिर देशमुख (रा. आक्सानगर, जारगाव, ता. पाचोरा) यांच्या इलेक्ट्रिक दुकानाच्या गोडाऊनमधून सुमारे 94 हजार 500 रुपये किंमतीचे ‘गोदरेज’ कंपनीचे तीन एसी अज्ञात चोरट्यांनी 1 एप्रिल ते 14 एप्रिल दरम्यान चोरून नेले होते. याप्रकरणी पाचोरा पोलीस ठाण्यात गुन्हा दाखल करण्यात आला होता.
‘….अन् पोलिसांनी आरोपीला केली अटक’ –
या गुन्ह्याचा तपास सुरू असताना जिल्हा पोलीस अधीक्षक माहेश्वर रेड्डी, अपर पोलीस अधीक्षक कविता नेरकर व उपविभागीय पोलीस अधिकारी बापू रोहम यांच्या मार्गदर्शनाखाली पोलीस निरीक्षक राहुलकुमार पवार व गुन्हे शोध पथकाने तातडीने तपासाची चक्रे फिरवली. दरम्यान, गोपनीय माहितीच्या आधारे पोलिसांनी रिहान हमीश शहा (वय 22, रा. हनुमाननगर, पाचोरा) याला ताब्यात घेतले. चौकशीत त्याने गुन्ह्याची कबुली दिल्यानंतर त्याच्याकडून चोरीस गेलेले तीन एसी जप्त करण्यात आले.
मुद्देमाल हस्तगत –
याचबरोबर, 15 एप्रिल रोजी दाखल झालेल्या सोन्याची पोत चोरी (30 हजार रुपये किंमत) या प्रकरणाचाही उलगडा करत पोलिसांनी दोन्ही गुन्ह्यांतील संपूर्ण मुद्देमाल हस्तगत केला. पोलिसांनी दाखविलेल्या तत्परतेमुळे संबंधित फिर्यादींसह परिसरातील नागरिकांनी पोलिसांचे कौतुक करत आभार मानले आहेत. या कारवाईमुळे गुन्हेगारांवर वचक बसण्यास मदत झाली आहे.
यांनी केली कारवाई –
जिल्हा पोलीस अधीक्षक माहेश्वर रेड्डी, अपर पोलीस अधीक्षक कविता नेरकर व उपविभागीय पोलीस अधिकारी बापू रोहम यांच्या मार्गदर्शनाखाली पोलीस निरीक्षक राहुलकुमार पवार यांच्या नेतृत्वात सहायक फौजदार विलास पाटील, पोहेकॉ. वसीम शेख, पोहेकॉ. श्रीकांत गायकवाड, पोकॉ. योगेश पाटील, पोकॉ. संदीप राजपूत, पोकॉ. गणेश कुंवर यांनी ही कारवाई केली.
