जळगाव, 16 जुलै: धावत्या लक्झरी बसमधून चांदी खरेदीसाठी नेण्यात येणारी तब्बल 25 लाख रुपये रोख रक्कम असलेली बॅग चोरी करणाऱ्या चौघा आरोपींना स्थानिक गुन्हे शाखेने अटक करत संपूर्ण रक्कम हस्तगत केली आहे. याप्रकरणात चौघांना अटक करण्यात आली असून सोनू उर्फ राम भगवान सारवान, शेख रहेमान शेख निसार, सचिन उर्फ मंगेश सूर्यकांत झांबरे आणि दशरथ सुरेश चौधरी (चौघं रा. जळगाव) अशी अटक केलेल्या आरोपींची नावे आहेत. तसेच गुन्हा करण्यासाठी वापरण्यात आलेली मारुती डिझायर (एमएच-47-सी-7877) ही कार देखील जप्त करण्यात आली आहे. या कारवाईची माहिती पोलीस अधीक्षक श्रीकांत धिवरे यांनी आयोजित पत्रकार परिषदेत दिली.
View this post on Instagram
नेमकं प्रकरण काय? –
पोलिसांनी दिलेल्या माहितीनुसार, 11 जुलै 2026 रोजी सायंकाळी साडेसहा वाजेच्या सुमारास पारोळा येथील नितीन पुरुषोत्तम वाणी हे जळगावातील सराफ व्यावसायिक प्रफुल्ल भागचंद सुराणा यांच्या पेढीसाठी खासगी कुरिअरचे काम करत कोल्हापूर येथे चांदी खरेदीसाठी निघाले होते. त्यांच्या ताब्यात 25 लाख रुपये रोख रक्कम असलेली बॅग होती. जळगाव येथून हेरे कृष्णा ट्रॅव्हल्सच्या बसने प्रवास सुरू असताना रात्री फर्दापूर (जि. छत्रपती संभाजीनगर) येथील साई सुरुची लॉजिंग अँड रेस्टॉरंट येथे बस जेवणासाठी थांबली.
यावेळी नितीन वाणी जेवणासाठी खाली उतरले असता त्यांनी पैशांची बॅग बसमध्येच ठेवली होती. जेवण करून परत आल्यानंतर त्यांना बॅग जागेवर दिसून आली नाही. बस पुढील प्रवासासाठी निघून गेल्यानंतर शोध घेतला असता बॅग मिळून न आल्याने अज्ञात चोरट्यांविरुद्ध एमआयडीसी पोलिस ठाण्यात गुन्हा दाखल करण्यात आला होता.
गोपनीय माहितीच्या आधारे आरोपी ताब्यात –
या गाजलेल्या गुन्ह्याचा तपास स्थानिक गुन्हे शाखेकडे सोपविण्यात आला होता. पोलीस अधीक्षक श्रीकांत धिवरे यांच्या मार्गदर्शनाखाली तपास सुरू असताना वरिष्ठ पोलीस निरीक्षक राहुल गायकवाड यांना मिळालेल्या गोपनीय माहितीनुसार, सराईत गुन्हेगार सोनू उर्फ राम भगवान सारवान (रा. गुरुनानक नगर, शनिपेठ, जळगाव) याने हा गुन्हा केल्याचे निष्पन्न झाले.
त्याला ताब्यात घेऊन चौकशी केली असता त्याने गुन्ह्याची कबुली देत आपल्या तीन साथीदारांची नावे सांगितली. त्यानंतर पोलिसांनी शेख रहेमान शेख निसार, सचिन उर्फ मंगेश सूर्यकांत झांबरे आणि दशरथ सुरेश चौधरी या तिघांनाही ताब्यात घेतले. चौघांनीही गुन्ह्याची कबुली दिली.
25 लाखांची रोकड जप्त –
तपासादरम्यान आरोपींकडून चोरीस गेलेली 25 लाख रुपयांची संपूर्ण रोकड हस्तगत करण्यात आली. तसेच गुन्हा करण्यासाठी वापरण्यात आलेली मारुती डिझायर (एमएच-47-सी-7877) ही कार उपलब्ध करून दिल्याचेही तपासात समोर आले आहे. पुढील कायदेशीर कारवाईसाठी सर्व आरोपींना एमआयडीसी पोलिसांच्या ताब्यात देण्यात आले असून गुन्ह्याचा पुढील तपास एमआयडीसी पोलीस करत आहेत.
यांनी केली कारवाई –
ही कारवाई पोलीस अधीक्षक श्रीकांत धिवरे, अपर पोलीस अधीक्षक संदीप गावीत आणि उपविभागीय पोलीस अधिकारी नितीन गणापुरे यांच्या मार्गदर्शनाखाली स्थानिक गुन्हे शाखेचे वरिष्ठ पोलीस निरीक्षक राहुल गायकवाड यांच्या नेतृत्वाखाली पो.उप.नि. दीपक जगदाळे, संतोष पवार सहा. फौज. अतुल वंजारी, पो.हे.कॉ. अक्रम शेख, विजय पाटील, मुरलीधर धनगर, प्रविण भालेराव, किशोर पाटील आणि पो. अ. राहुल रगडे, प्रदिप सपकाळे, रवींद्र कापडणे, छगन तायडे सर्व नेम. स्थानिक गुन्हे शाखा यांच्या पथकाने यशस्वीरीत्या पार पाडली.
