जळगाव, 2 सप्टेंबर: इतर मागास बहुजन कल्याण विभागातर्फे मूळजी जेठा महाविद्यालय, जळगाव येथील सभागृहात ‘भटके विमुक्त दिवस’ कार्यक्रमाचे आयोजन उत्साहपूर्ण वातावरणात करण्यात आले. भटके विमुक्त समाजाचा इतिहास, संघर्ष, सामाजिक विकासातील योगदान तसेच समाजातील विद्यार्थी व नागरिकांना शासनाच्या विविध योजनांची माहिती मिळावी, या उद्देशाने कार्यक्रमाचे आयोजन करण्यात आले होते.
कार्यक्रमाचे प्रमुख पाहुणे मनोहर अंधाळे, सेवानिवृत्त प्राचार्य उपस्थित होते. प्रास्ताविकात विशाल राठोड, सहायक संचालक यांनी भटके विमुक्त दिनाचे महत्त्व विशद केले. तसेच विभागाच्या शैक्षणिक, सामाजिक योजना व पायाभूत सुविधा निर्मितीसाठीच्या योजना व विविध उपक्रमांची माहिती उपस्थितांना दिली. यावेळी महाज्योती, वनार्टी तसेच वित्त व विकास महामंडळाच्या विविध योजनांची माहिती देण्यात आली. या योजनांचा लाभ भटके विमुक्त समाजातील विद्यार्थी, युवक व नागरिकांनी घेऊन शैक्षणिक, आर्थिक व सामाजिक प्रगती साधावी, असे आवाहन करण्यात आले.
यावेळी विकास माळुकर यांनी आपल्या व्याख्यानातून भटके विमुक्त समाजाचा इतिहास, समाजाने केलेला संघर्ष आणि सामाजिक विकासातील योगदान याबाबत सविस्तर मार्गदर्शन केले. कार्यक्रमात विजाभज आश्रमशाळेतील विद्यार्थ्यांनी व भटक्या समाजातील लोककलावंतांनी सांस्कृतिक कार्यक्रम सादर केले. तसेच शैक्षणिक, क्रीडा क्षेत्रात विशेष प्राविण्य मिळविलेल्या विद्यार्थ्यांचा सन्मानचिन्ह देऊन गौरव करण्यात आला.
कार्यक्रमास विभागाचे अधिकारी-कर्मचारी, भटके विमुक्त समाजातील मान्यवर व प्रतिनिधी, विद्यार्थी, पालक तसेच नागरिक मोठ्या संख्येने उपस्थित होते. कार्यक्रमाची सांगता आभार प्रदर्शन व राष्ट्रगानाने करण्यात आली.
हेही वाचा: रेशीम शेतीची संपूर्ण मूल्यसाखळी गावपातळीवर उभारणार; मंत्री संजय सावकारे यांची माहिती
