जळगाव, 20 ऑक्टोबर: संजय गांधी निराधार अनुदान योजनेसह विशेष सहाय्य योजनांच्या निकषांमध्ये राज्य शासनाने सुधारणा केल्या आहेत. या निर्णयाच्या पार्श्वभूमीवर सामाजिक व माहिती अधिकार कार्यकर्ते शांताराम उर्फ अण्णासाहेब बेलदार यांनी १९ ऑक्टोबर रोजी जिल्हाधिकारी रोहन घुगे यांची भेट घेऊन शासनाचे आभार मानले. विशेष सहाय्य योजनांचा लाभ घेताना लाभार्थ्यांना भेडसावणाऱ्या कागदपत्रांच्या अडचणींकडे लक्ष वेधण्यासाठी बेलदार यांनी यापूर्वी जिल्हाधिकाऱ्यांकडे निवेदन सादर केले होते.
संजय गांधी निराधार अनुदान योजनेअंतर्गत ज्येष्ठ नागरिक, दिव्यांग व्यक्ती, आर्थिकदृष्ट्या दुर्बल घटकांतील व्यक्ती, निराधार तसेच गरीब विधवा व परित्यक्ता महिलांना आर्थिक सहाय्य दिले जाते. मात्र, ग्रामीण आणि दुर्गम भागातील अनेक लाभार्थ्यांकडे जन्मदाखला किंवा शाळेचा दाखला उपलब्ध नसल्याने कागदपत्रांची पूर्तता करताना अडचणी येत होत्या. या पार्श्वभूमीवर संबंधित अटींचा पुनर्विचार करून पर्यायी शासकीय पुराव्यांच्या आधारे पडताळणीची व्यवस्था करावी, अशी मागणी बेलदार यांनी निवेदनाद्वारे केली होती.
जिल्हाधिकारी कार्यालयाकडून पत्रव्यवहार –
बेलदार यांच्या निवेदनाची दखल घेत जिल्हाधिकारी रोहन घुगे यांनी संबंधित प्रशासनाला सूचना केल्या होत्या. त्यानंतर जिल्हाधिकारी कार्यालयाच्या संजय गांधी शाखेमार्फत सामाजिक न्याय व विशेष सहाय्य विभागाकडे पत्रव्यवहार करण्यात आला होता. दरम्यान, १४ ऑक्टोबर २०२६ रोजी विभागाने विशेष सहाय्य योजनांच्या निकषांमध्ये सुधारणा करण्याबाबत शासन निर्णय निर्गमित केला.
लाभार्थ्यांना दिलासा मिळण्याची अपेक्षा –
शासनाने निकषांमध्ये सुधारणा केल्याच्या पार्श्वभूमीवर बेलदार यांनी जिल्हाधिकाऱ्यांची भेट घेऊन शासनाचे आभार मानले. कागदपत्रांच्या अडचणींमुळे शासकीय सहाय्य मिळविताना अडथळे येणाऱ्या पात्र लाभार्थ्यांना या सुधारणांचा लाभ मिळण्याची अपेक्षा आहे. सुधारित निकषांनुसार पात्र लाभार्थ्यांना योजनांचा लाभ मिळवून देण्यासाठी प्रशासनाकडून प्रभावी अंमलबजावणी होणे महत्त्वाचे ठरणार आहे.
