चंद्रकांत दुसाने, विशेष प्रतिनिधी
जळगाव, 27 मार्च : राज्यात सध्या लोकसभा निवडणुकींची रणधुमाळी सुरू असताना राजकीय पक्षांकडून उमेदवारांच्या नावाची घोषणा करण्यात येत आहे. दरम्यान, शिवसेना उद्धव बाळासाहेब ठाकरे पक्षाची आज 16 उमेदवारांची नावे जाहीर करण्यात आली. मात्र, महाविकास आघाडीत जळगाव लोकसभा मतदारसंघ ठाकरे गटाच्या वाटेला आला असताना ठाकरे गटाने जाहीर केलेल्या पहिल्या यादीत जळगाव लोकसभा मतदारसंघाचा समावेश नाहीये.
काय संपूर्ण बातमी? –
लोकसभा निवडणुकीसाठी शिवसेना उद्धव बाळासाहेब ठाकरे पक्षाची आज 16 उमेदवारांची यादी जाहीर करण्यात आली. दरम्यान, गेल्या काही दिवसांपासून सर्वांचे लक्ष लागलेल्या जळगाव लोकसभा मतदारसंघाचा या यादीत समावेश नसल्याने राजकीय वर्तुळात मोठ्या प्रमाणात चर्चांना सुरूवात झाली आहे.
स्मिता वाघ यांच्याविरोधात कोण? –
गेल्या काही दिवसांपूर्वीच भारतीय जनता पक्षाच्यावतीने जळगाव लोकसभा मतदारसंघाचे खासदार उन्मेश पाटील यांचे तिकीट कापत भाजपच्या स्मिता वाघ यांना उमेदवारी देण्यात आली. यानंतर स्मिता वाघ यांच्याविरोधातील लढतीसाठी ठाकरे गट नेमकी कुणाला उमेदवारी जाहीर करणार याकडे सर्वांचे लक्ष लागले आहे.
उन्मेश पाटील ठाकरे गटात जाणार? –
भाजपने जळगाव लोकसभा मतदारसंघाचे विद्यमान खासदार उन्मेश पाटील यांचे तिकीट कापत स्मिता वाघ यांना उमेदवारी दिली. दरम्यान, उन्मेश पाटील यांनी त्यांची भूमिका स्पष्ठ करत पक्षासाठी काम करणार असल्याचे सांगितले होते. मात्र, अद्यापही खासदार उन्मेश पाटील यांची भूमिका स्पष्ठ नसल्याचे चित्र दिसून येत आहे. तसेच उन्मेश पाटील किंवा त्यांच्या पत्नी संपदा पाटील हे ठाकरे गटाच्या मशाल चिन्हावर निवडणूक लढविणार असल्याच्या देखील चर्चा मोठ्या प्रमाणात रंगू लागल्या आहेत. मात्र, उन्मेश पाटील यांनी अद्यापही यावर अधिकृत प्रतिक्रिया न दिल्याने या चर्चा अफवा असल्याचेही बोलले जात आहे.
हेही वाचा : मोठी बातमी! सात टप्प्यात होणार लोकसभा निवडणूक, खान्देशात ‘या’ तारखेला होणार मतदान
