नवी दिल्ली, 20 मे : इराणचे राष्ट्राध्यक्ष इब्राहीम रईसी हे हेलिकॉप्टरने अजरबैजान देशातून इराणमध्ये परतत असताना त्यांचे हेलिकॉप्टर कोसळले. या हेलिकॉप्टरच्या शोध घेण्यासाठी मोहीम हाती घेण्यात आली होती. दरम्यान, तब्बल 17 तासांनंतर हे हेलिकॉप्टर शोध आणि बचाव पथकाला सापडले. परंतु, या अपघातात इब्राहीम रईसी यांचा मृत्यू झाल्याची माहिती समोर आली.
काय आहे संपूर्ण बातमी? –
मिळालेल्या माहितीनुसार, इब्राहीम रईसी हे हेलिकॉप्टरमधून प्रवास करत असताना पूर्व अजरबैजानमध्ये जंगलात या हेलिकॉप्टरचा अपघात झाला. प्रवासादरम्यान खराब हवामान आणि घनदाट धुक्यामुळे रईसी यांच्या हेलिकॉप्टरचे हार्ड लँडिंग करण्याचा प्रयत्न करण्यात आला. मात्र, हार्ड लँडिंग करत असताना हेलिकॉप्टर कोसळले. या दुर्घनेत रईसी यांचे निधन झाल्याचे सांगितले जात आहे.
पंतप्रधान मोदींनी वाहिली श्रद्धांजली –
इब्राहीम रईसी यांच्या निधनावर पंतप्रधान नरेंद्र मोदी यांनी शोक व्यक्त करत श्रद्धांजली वाहिली. त्यांनी एक्सवर पोस्ट करत म्हटलंय की, “इराणचे इस्लामिक रिपब्लिकचे राष्ट्राध्यक्ष डॉ. सय्यद इब्राहीम रईसी यांच्या दुःखद निधनाने खूप दु:ख आणि मोठा धक्का बसला आहे. भारत-इराण द्विपक्षीय संबंध मजबूत करण्यात त्यांनी दिलेले योगदान नेहमीच स्मरणात ठेवले जाईल. माझ्या त्यांच्या कुटुंबीयांप्रती संवेदना आणि श्रद्धांजली. या दु:खाच्या काळात भारत इराणच्या पाठीशी उभे असल्याचेही मोदींनी एक्सपोस्टमध्ये म्हटले आहे.
