बारामती, 28 जानेवारी : राज्याचे उपमुख्यमंत्री अजित पवार यांचे आज बारामती विमान अपघातात दुर्दैवीपणे निधन झाले. या पार्श्वभूमीवर बारामतीसह देशभरातून शोक व्यक्त केला जात आहे. पवार कुटंब देखील बारामतीत दाखल झाले असून आता अजित दादांच्या पार्थिवावर होणाऱ्या अत्यंसंस्काराबाबत महत्वाची माहिती समोर आली आहे.
बारामती विमान अपघातात अजित दादांचे निधन –
राज्यात 12 जिल्हा परिषदांच्या निवडणुकीसाठी सुरू असलेल्या प्रचाराच्या पार्श्वभूमीवर उपमुख्यमंत्री अजित पवार हे आज मुंबईवरून सकाळी 8 वाजून 10 मिनिटांनी बारामतीसाठी रवाना झाले होते. बारामतीत पोहचण्यासाठी पाच मिनिटांचा वेळ उरला असतानाचा सकाळी पावणे नऊ वाजेच्या सुमारास त्यांच्या विमानाचा अपघात झाला. यामध्ये अजित पवार यांच्यासह पाच जणांचा दुर्दैवी मृत्यू झाला. दरम्यान, महाराष्ट्राचं दादा नेतृत्त्व आज हरपल्याच्या भावना आता व्यक्त केल्या जात आहेत.
अजित पवार यांच्या पार्थिवावर उद्या अंत्यसंस्कार –
अजित पवार यांचे पार्थिव आज संध्याकाळपर्यंत बारामतीत अंतिम दर्शनासाठी ठेवले जाण्याची शक्यता आहे. उद्या, सकाळी सुमारे 11 वाजता त्यांची अंत्ययात्रा निघणार आहे. त्यानंतर बारामतीतील मिशन हायस्कूल मैदानावर किंवा पवार कुटुंबाच्या शेतात त्यांच्यावर अंत्यसंस्कार केले जाणार आहेत. राज्य सरकारने राजकीय शोक जाहीर केला असून, अंत्यसंस्काराच्या वेळी त्यांना ‘गार्ड ऑफ ऑनर’ देऊन मानवंदना दिली जाणार आहे.
मुख्यमंत्री-उपमुख्यमंत्री आज बारामतीत दाखल होणार –
मुख्यमंत्री देवेंद्र फडणवीस यांनी आपले सर्व कार्यक्रम रद्द केले आहेत. तसेच मुख्यमंत्री फडणवीस आणि उपमुख्यमंत्री एकनाथ शिंदे दोघेही आजच बारामतीत दाखल होणार आहेत. राज्यात आज शासकीय सुटी जाहीर करण्यात आली असून तीन दिवसांचा दुखवटा जाहीर करण्यात आला आहे.
हेही वाचा : उपमुख्यमंत्री अजित पवार यांचा विमान अपघातात दुर्दैवी मृत्यू; पंतप्रधान नरेंद्र मोदींची भावूक पोस्ट
