भडगाव, 23 जानेवारी : भडगाव तालुक्यातून एक दु:खद बातमी समोर आली आहे. भडगाव तालुक्यातील रहिवाशी केंद्रीय औद्योगिक सुरक्षा दल म्हणजे सीआयएसएफ मध्ये सेवा बजावत असलेले जवान मनोज लक्ष्मण चौधरी (वय-35) यांचे दिल्ली येथे उपचारादरम्यान निधन झाले आहे. मनोज लक्ष्मण चौधरी हे फरीदाबाद येथे सीआयएसएममध्ये सेवा बजावत होते. आज (सोमवारी) रात्री 8 वाजताच्या सुमारास ही घटना घडली.
काय आहे संपूर्ण बातमी –
सीआयएसएफ जवान मनोज लक्ष्मण चौधरी यांना आज रात्री दिल्ली येथे सेवेत असताना हृदयविकाराचा झटका आला. यानंतर त्यांना रुग्णालयात दाखल करण्यात आले. मात्र, तेथे त्यांचा मृत्यू झाला. दरम्यान, शवविच्छेदन केल्यानंतर दिल्लीहुन विमानाने औरंगाबाद येथे त्यांचा मृतदेह आणण्यात येणार आहे. यानंतर औरंगाबादहुन वाडे या त्यांच्या गावी रुग्णवाहिकेतून त्यांचा मृतदेह आणण्यात येणार आहे. यानंतर उद्या मंगळवारी 24 जानेवारीला सकाळी 10 वाजता त्यांच्यावर शासकीय इतमामात अंत्यसंस्कार करण्यात आहे.
शहीद जवान मनोज चौधरी हे वाडे येथील रहिवाशी व जिप विभागाचे सेवानिवृत्त लिपीक लक्ष्मण ओंकार चौधरी यांचे लहान चिरंजीव होते. मनोज चौधरी हे 9 वर्षापुर्वी दिल्ली येथे सीआयएसएफमध्ये भरती झाले होते. सध्या ते दिल्ली फरीदाबाद येथे सेवा बजावत होते. त्यांच्या पश्चात वडील, आई, भाऊ, पत्नी, 3 वर्षांची मुलगी असा परिवार आहे. दरम्यान, त्यांच्या अंत्यसंस्कारासाठी वाडे येथे तरुण मंडळी, ग्रामस्थांमार्फत अंत्यसंस्कारासाठी नियोजन सुरू आहे. तसेच भडगाव पोलीस स्टेशनमार्फत पोलीस बंदोबस्त लावण्यात आला आहे.
