चंद्रकांत दुसाने, विशेष प्रतिनिधी
मुंबई, 3 एप्रिल : लोकसभा निवडणुकीच्या पार्श्वभूमीवर संपूर्ण राज्याचे लक्ष लागलेल्या जळगाव लोकसभा मतदारसंघात राजकीय भूकंप झाला आहे. यंदाच्या लोकसभा निवडणुकीसाठी भाजपकडून तिकिट कापण्यात आलेले भाजपचे माजी खासदार उन्मेष पाटील यांनी शिवसेना उद्धव बाळासाहेब ठाकरे पक्षात प्रवेश केला आहे.
खासदार उन्मेष पाटील ठाकरेंच्या शिवसेनेत –
मुंबईतील शिवसेना उद्धव बाळासाहेब ठाकरे पक्षाचे प्रमुख उद्धव ठाकरे यांच्या मातोश्री या निवासस्थानी आज दुपारी पक्षप्रवेश सोहळ्याचे आयोजन करण्यात आले. या सोहळ्यात उद्धव ठाकरे यांच्या उपस्थितीत माजी खासदार उन्मेष पाटील यांच्यासह पारोळ्याचे माजी नगराध्यक्ष करण पवार यांनी प्रवेश केला. यावेळी खासदार संजय राऊत, खासदार अरविंद सावंत, जळगाव जिल्हा संपर्कप्रमुख संजय सावंत सह संपर्क प्रमुख गुलाबराव वाघ, जिल्हा प्रमुख विष्णू भंगाळे,मनपा माजी विरोधी पक्षनेते सुनिल महाजन, ॲड. ललिता पाटील,विराज कावडीया सह शेकडो कार्यकर्ते उपस्थित होते.
जळगावात भाजपला धक्का –
गेल्या काही दिवसांपासून माजी खासदार उन्मेष पाटील हे ठाकरे गटाच्या वाटेवर असल्याचे बोलले जात होते. दरम्यान, काल त्यांनी मुंबईत ठाकरे गटाचे खासदार संजय राऊतांची त्यांच्या भांडूप येथील निवासस्थानी भेट घेतली. यानंतर थोड्याच वेळाने त्यांनी राज्याचे माजी मुख्यमंत्री उद्धव ठाकरे यांची मातोश्रीवर भेट घेत पक्षप्रवेशाबद्दल चर्चा केली. दरम्यान, आज उन्मेष पाटील यांनी ठाकरे गटात प्रवेश केल्याने भाजपला मोठा धक्का बसल्याचे बोलले जात आहे.
स्मिता वाघ यांच्याविरोधात कट्टर लढत –
जळगाव लोकसभा मतदारसंघासाठी भाजपकडून स्मिता वाघ यांना उमेदवारी जाहीर झाल्यानंतर खासदारकीची लढत एकतर्फी मानली जात होती. या पार्श्वभूमीवर स्मिता वाघ यांनी प्रचारास देखील सुरूवात केली होती. मात्र, तिकिट कापल्यानंतरच्या पहिल्या दिवसापासूनच खासदार उन्मेष पाटील नाराज असल्याचे बोलले जात होते. दरम्यान, जिल्हास्तरीय ठाकरे गटाच्या पदाधिकाऱ्यांच्यावतीने ते उद्धव ठाकरे यांच्या संपर्कात असल्याच्या चर्चा रंगल्या होत्या. दरम्यान, उन्मेष पाटील यांनी ठाकरे गटात प्रवेश करत जळगाव लोकसभा मतदारसंघात खासदारकीच्या निवडणुकीसाठी भाजपपुढे नवे आव्हान उभ केले असून स्मिता वाघ यांच्याविरोधातील लढत कट्टर होणार असल्याचे संकेत त्यांनी दिले आहेत.
भाजपविरोधात ठाकरे गटाकडून कोण लढणार –
भाजपने खासदार उन्मेष पाटील यांचे तिकिट कापल्याने ते नाराज असल्याच्या पार्श्वभूमीवर ठाकरे गटाने जळगाव लोकसभा मतदारसंघासाठी उमेदवार जाहीर करण्याबाबत सावध पवित्रा घेतला होता. दरम्यान, ठाकरे गटात प्रवेश केल्याने जळगाव लोकसभा मतदारसंघाच्या उमेदवारीसाठी उन्मेष पाटील दावेदार मानले जात असताना पारोळ्याचे करण पवार यांचे नाव देखील आघाडीवर आहे.
