अक्कलकोट, 11 जुलै : मुख्यमंत्री एकनाथ शिंदे यांची लोकनेते अशी ओळख आहे. अनेकवेळा सर्वसामान्य माणसांत मिसळून आपण त्यांच्यातीलच एक असल्याचे ते दाखवून देत असतात. मात्र, यानंतर आता मुख्यमंत्री एकनाथ शिंदे यांच्या पत्नी लता शिंदे यांच्याबाबतही असाच एक प्रत्यय नुकताच अक्कलकोट येथे पाहायला मिळाला आहे.
मुख्यमंत्री एकनाथ शिंदे यांच्या पत्नी लता शिंदे यांच्या वाढदिवसानिमित्त त्या तसेच शिंदे कुटुंबातील इतर काही सदस्य यांनी नुकतीच अक्कलकोट येथे जाऊन श्री स्वामी समर्थांच्या पादुका तसेच समाधीस्थळाचे दर्शन घेतले. यानंतर प्रथेप्रमाणे त्यांनी अन्नछत्राला भेट दिली. मात्र, यावेळी त्यांनी सर्वसामान्य सेवेकरी बनून स्वामी भक्तांना अन्नदान करण्याची इच्छा व्यक्त केली.
तसेच त्यानंतर स्वतः हातात भाजी आणि भाताचे भांडे घेऊन त्यांनी वाढपी बनून सर्वसामान्य भक्तांना आग्रहपूर्वक प्रसाद वाढला आणि यानंतर वाढून झाल्यानंतर स्वतः आपल्या सर्व सहकाऱ्यांच्या सोबत सर्वसामान्य भक्तासोबत बसून प्रसाद ग्रहण केला. मुख्यमंत्री एकनाथ शिंदे यांच्या पत्नी लता शिंदे यांचा हा साधेपणा पाहून उपस्थित भाविकांनाही आश्चर्याचा धक्का बसला.
एकीकडे आमदार, खासदार दर्शनासाठी आले की त्यांचे दर्शन होईपर्यंत सर्वसामान्य भक्तांना ताटकळात बसावे लागते. मात्र, इथे मुख्यमंत्री शिंदे यांच्या पत्नी लता शिंदे यांनी मिसेस मुख्यमंत्रीपदाचा बडेजाव बाजूला ठेवला आणि सर्वसामान्य भक्तांप्रमाणे प्रसाद वाढला आणि सोबत बसून तो ग्रहणही केला. हे सर्व दृश्य पाहून उपस्थित भक्तगण अवाक झाल्याचे पाहायला मिळाले.
