जळगाव, 9 डिसेंबर : जळगाव जिल्ह्यासह राज्यात मागील आठवड्यात थंडीचा जोर कमी झाल्याने उकाडा जाणवू लागला होता. दरम्यान, जळगावसह राज्यात थंडीचे पुन्हा एकदा आगमन झाले असून तापमान घट झाली आहे. येत्या काही दिवस थंडीचा जोर कायम राहणार असल्याचा अंदाज व्यक्त करण्यात आला आहे.
‘फेंगल’ चक्रीवादळामुळे महाराष्ट्रात सर्वत्र हुडहुडी –
बंगालच्या उपसागरात निर्माण झालेल्या ‘फेंगल’ चक्रीवादळामुळे दक्षिण भारताला मोठा फटका बसला. त्याचाच परिणाम सध्या मुंबईसह महाराष्ट्रात पाहायला मिळत असून बहुतांश जिल्ह्यात तापमान 10 ते 20 अंशाच्या दरम्यान गेल्याने थंडीचा जोर चांगलाच वाढला आहे. मुंबईसह पुणे, नाशिक, जळगाव, धुळे, नागपूर, सोलापूर या भागातील तापमानातही घट झाली असून त्यामुळे महाराष्ट्रात सर्वत्र हुडहुडी भरल्याचे पाहायला मिळत आहे.
जळगाव जिल्ह्यात थंडी वाढली –
फंगल चक्रीवादळाचा प्रभाव पुर्णपणे कमी झाल्यामुळे जळगाव जिल्ह्यासह राज्यात निर्माण झालेले ढगाळ वातावरण कमी होऊन, कोरडे हवामान निर्माण झाले आहे. त्यामुळे थंडीच्या प्रमाणात वाढ झाली आहे. काल, रविवारी जळगाव शहराचा पारा 11 अंशांवर आला होता. तत्पुर्वी, शुक्रवारी जळगाव शहराचा रात्रीचा पारा 18 अंशांपर्यंत गेला होता. मात्र, आता उत्तरेकडून येणारे थंड वारे सक्रिय झाल्यामुळे जळगाव जिल्ह्यात थंडीचा जोर वाढला आहे.
जळगाव जिल्ह्याचे पुढील तीन दिवसाचे तापमान –
- 9 डिसेंबर – कमाल तापमान – 10 अंश
- 10 डिसेंबर – कमाल तापमान – 9 अंश
- 11 डिसेंबर – कमाल तापमान – 9 अंश
हेही वाचा : गुलाबराव देवकरांच्या प्रवेशाला अजित पवार गटाच्या पदाधिकाऱ्यांचा विरोध; वाचा, सविस्तर बातमी…
