जळगाव, 26 जुलै : जळगाव जिल्हा सैनिक कल्याण कार्यालयाच्यावतीने कारगिल विजय दिवस साजरा करण्यात आला. दरम्यान, कारगिल विजय दिवस (रौप्य महोत्सव) औचित्य साधुन जिल्हाधिकारी आयुष प्रसाद यांनी उपस्थितांसोबत संवाद साधला. तसेच माजी सैनिक/ कार्यरत सैनिकांसाठी सैनिक कॉलनी, शहिद युध्द स्मारक, सैनिकी शाळा उभे करण्यासाठी प्रयत्न करणार असल्याचे सांगितले. तसेच सैनिकासाठी शिबीर आयोजन तसेच सर्व माजी सैनिक/ कार्यरत सैनिकांची कामे ही वेळेत पुर्ण केली जातील, असेही त्यांनी यावेळी सांगितले.
कारगिल विजय दिवस उत्साहात साजरा –
शहिद सैनिकांच्या बलिदानाची कृतज्ञता व्यक्त करण्यासाठी दरवर्षी देशभरात दिनांक 26 जुलै रोजी कारगिल विजय दिवस साजरा करण्यात येतो. त्या अनुषंगाने जळगाव जिल्हा सैनिक कल्याण कार्यालयाच्यावतीने आज 26 जुलै 2024 रोजी सकाळी 11 वाजता माजी सैनिक बहुउद्येशिय सभागृह जळगाव येथे कारगिल विजय दिवस साजरा करण्यात आला.
रक्तदान शिबीराचे आयोजन –
या कार्यक्रमात युध्दात शहिद झालेले अधिकारी/जवान यांच्या अवलंबितांचा कारगिल विजय दिवसाचे औचित्य साधुन शॉल व श्रीफळ देऊन यथोचित सत्कार करण्यात आला. तसेच जवान फाऊंडेशन जळगांव व रेड प्लस ब्लड बँक तसेच जिल्हा सैनिक कल्याण कार्यालय, जळगांव यांच्या संयुक्त विद्यमाने भव्य रक्तदान शिबीराचे आयोजन करण्यात आले होते.
यांची होती उपस्थिती –
जिल्हाधिकारी आयुष प्रसाद यांच्या अध्यक्षतेखाली आयोजित कार्यक्रमाला निवासी उपजिल्हाधिकारी तथा सैनिक कल्याण अधिकारी सोपान कासार, सहाय्यक जिल्हा सैनिक कल्याण अधिकारी संजय रामराव गायकवाड, वरिष्ठ लिपीक जितेंद्र हिंदुराव इमडे, लिपीक टंकलेखक रतिलाल भूरा महाजन, कैलास वनिलाल लोहार, जवान फाऊंडेशन जळगावचे ईश्वर मोरे, सह संयोजक रेड प्लस ब्लड बँकचे भरत गायकवाड, जळगांव जागृत जनमंचचे शिवराम पाटील, आर टी आय कार्यकर्ते दिपक गुप्ता, आदी मान्यवर उपस्थित होते.
