पुणे, 3 ऑक्टोबर : प्रसिद्ध किर्तनकार आणि सोशल मीडियावर ॲक्टिव्ह असणाऱ्या चैतन्य सयाजी महाराज वाडेकर यांना पिंपरी- चिंचवड पोलिसांनी अटक केल्याची माहिती समोर आली आहे. चैतन्य महाराज यांनी त्यांच्या इतर दोन भावांसह आणि नातेवाईकांसह घराच्या जवळून जाणारा रस्ता पोकलेनने बेकायदेशीरपणे खोदल्याने पोलिसांनी त्यांना बेड्या ठोकल्याचे समजते. दरम्यान, याप्रकरणी चैतन्य सयाजी वाडेकर (महाराज), अमोल सयाजी वाडेकर, प्रमोद सयाजी वाडेकर आणि ऋषिकेश शशिकांत सूर्यवंशी यांना पोलिसांनी अटक केलीय.
नेमकं काय प्रकरण? –
मिळालेल्या माहितीनुसार, म्हाळुंगे परिसरामध्ये चैतन्य महाराज वाडेकर हे राहतात. त्यांच्या घराजवळ एक कंपनी असून त्या ठिकाणाहून जाणाऱ्या रस्त्यावरून त्यांचे वाद आहेत. बुधवारी रात्री कंपनीत जाणारा रस्ता बेकायदेशीर खोदला आणि यावेळी त्यांचे इतर एक नातेवाईक आणि दोन बंधू होते. तसेच कंपनीच्या कंपाउंडचे पत्रे देखील काढण्यात आलेले आहेत. असे पोलिसांना दिलेल्या तक्रारीत म्हटले आहे. अखेर, या प्रकरणी कंपनीचे व्यवस्थापक अजित पाटील यांनी म्हाळुंगे पोलिसात तक्रार दिली.
पोलिसांनी केली अटक –
दरम्यान, याप्रकरणी म्हाळुंगे पोलिसांनी चैतन्य सयाजी वाडेकर, अमोल सयाजी वाडेकर, प्रमोद सयाजी वाडेकर आणि ऋषिकेश शशिकांत सूर्यवंशी यांना अटक केली आहे. चैतन्य महाराज वाडेकर हे नेहमीच सोशल मीडियावर ऍक्टिव्ह असतात. ते रिल्स देखील बनवत असतात. त्यांचे सोशल मीडियावर लाखो चाहते असून त्यांच्या या अटकेमुळे त्यांच्या चाहत्यांना धक्का बसला आहे.
हेही पाहा : महाराष्ट्राच्या नवदुर्गा : महिला सुरक्षेवर परखड मत, जेष्ठ गायिका अनुराधा पौडवाल यांची विशेष मुलाखत
