ईसा तडवी, प्रतिनिधी
पाचोरा, 6 फेब्रुवारी : पाचोरा-भडगाव मतदारसंघाचा मी तिसऱ्यांदा आमदार झालो. खरंतर, तिसऱ्यांदा आमदार होण्याचे श्रेय हे सर्वात जास्त लाडक्या भगिनींचे असल्याचे, आमदार किशोर आप्पा पाटील यांनी सांगितले. पाचोरा शहरातील प्रभाग क्रमांक 8 मध्ये बंडू केशव सोनार यांच्या वतीने आमदार किशोर आप्पा पाटील यांचा नुकताच भव्य नागरिक सत्कार संपन्न झाला. त्यावेळी ते बोलत होते.
किशोर आप्पा पाटील काय म्हणाले? –
सत्कार समारंभानिमित्त आयोजित केलेल्या कार्यक्रमात उपस्थितांसोबत संवाद साधताना आमदार किशोर आप्पा पाटील म्हणाले की, पाचोरा भडगाव मतदारसंघातील जनतेने तिसऱ्यांदा कुणालाच आमदार केले नव्हते. मात्र, मतदारसंघाने ऐतिहासिक विजय मिळवून देत मला तिसऱ्यांदा आमदार बनवून दिले. आजपर्यंत 27 हजारांपेक्षा जास्त मताधिक्य कुणालाच मिळाले नव्हते. मात्र, ते 2014 साली तेवढे मताधिक्य मला मिळाले आणि तोही एक रेकॉर्डच होता.
खरंतर, 2024 च्या निवडणुकीत मतदारसंघातील जनतेने तिसऱ्यांदा माझाच रेकॉर्ड मला मोडायला लावला आणि 40 हजारांचे मताधिक्य मला मिळवून दिले. यासोबतच केवळ पाचोरा शहरातून 10 हजाराहून अधिक मताधिक्य मिळाल्याने नवा रेकॉर्ड झाला. तसेच आमच्या प्रभागाचा आमदार म्हणून प्रभाग क्र. 8 मध्ये मला जे मताधिक्य दिल्यामुळे पाचोरा शहरातील सर्वात जास्त मतदान देणारा हा प्रभाग ठरला असल्याचे आमदार पाटील म्हणाले.
दरम्यान, कुठलेही पद नसताना बंडू सोनार यांनी ज्यापद्धतीने पक्षसाठी तसेच प्रभागासाठी काम केलंय. तसेच माझा सत्कार समारंभाचे त्यांनी आयोजन केले. यासाठी मी त्यांचे व त्यांच्या परिवाराचे मनापासून आभार मानतो, असेही आमदार किशोर आप्पा पाटील म्हणाले. यावेळी माजी नगराध्यक्षा सुनिता पाटील, माजी नगरसेवक शितल सोमवंशी, शिवसेना शहरप्रमुख सुमित सावंत, भाजपचे नंदू सोमवंशी यांच्यासह शिवसेना पदाधिकारी-कार्यकर्ते तसेच प्रभाग क्रं.8 मधील महिला-पुरूष उपस्थित होते.
हेही वाचा : संत तुकाराम महाराजांचे वंशज शिरीष महाराज मोरे यांची आत्महत्या; सोसाईड नोटही सापडली, आत्महत्येचं कारण समोर!
