मुंबई, 9 ऑगस्ट : जेष्ठ लेखक तथा विचारवंत व समता परिषदेचे उपाध्यक्ष प्रा. हरी नरके यांचे निधन झाले आहे. मुंबईतील एशियन हार्ट हॉस्पिटलमध्ये त्यांनी वयाच्या 60 व्या वर्षी अखेरचा श्वास घेतला. गेल्या काही दिवसांपासून ते आजारी असल्याचेही सांगण्यात येत आहे. मात्र, ह्रदयविकाराच्या झटक्याने त्यांचे निधन झाल्याची प्राथमिक माहिती समोर आली आहे.
हरी नरके यांच्याबाबत –
प्रा. हरी नरके पुणे विद्यापीठातील महात्मा फुले अध्यासनाचे प्राध्यापक होते. ते महाराष्ट्र राज्य मागासवर्ग आयोगाचे सदस्य देखील होते.प्रा. हरी नरके यांची दोन पुस्तके प्रसिद्ध आहेत. महात्मा फुले यांची बदनामीः एक सत्यशोधन आणि महात्मा फुले – शोधाच्या नव्या वाटा या दोन पुस्तकांचा समावेश आहे. मराठी भाषा ही संस्कृत, कन्नड, तेलुगू यांप्रमाणेच एक अभिजात भारतीय भाषा आहे, हे सिध्द करण्यासाठी नेमलेल्या रंगनाथ पठारे समितीच्या अहवालात प्रमुख समन्वयक म्हणून त्यांचे मोठे योगदान राहिले आहे. त्याशिवाय महात्मा फुले यांचे मूळ छायाचित्र शोधून प्रसिद्ध करण्यात त्यांचा मोठा सहभाग होता.
समाज माध्यमांवर सक्रिय –
प्रा. हरी नरके सोशल मीडियावरही सातत्याने लिखाण करत होते. त्यामुळे सोशल मीडियावरही त्यांचा मोठी फॅन फॉलोविंग होती. विशेष म्हणजे त्यांनी 20 तासांपूर्वी सोशल त्यांच्या फेसबूक पेजवर एका मुलाखतीसंदर्भातील पोस्ट केली आहे. प्रा. हरी नरके यांच्या निधनाने समाज एका पुरोगामी चळवळीला मुकला आहे.
