सुनिल माळी, प्रतिनिधी
पारोळा, 1 ऑक्टोबर : जळगाव जिल्ह्यात लाचखोरीच्या प्रकरणांमध्ये वाढ होत असताना पारोळ्यातून लाच घेतल्याचे प्रकरण समोर आले आहे. सातबारा उताऱ्यावर बोजा चढवण्याच्या मोबदल्यात 1 हजारांची लाच घेणाऱ्या तलाठीसह एका खाजगी पंटरला जळगाव लाच लुचपत विभागाने काल दुपारी 30 सप्टेंबर रोजी रंगेहाथ अटक केली आहे. तलाठी सुभाष विठ्ठल वाघमारे (वय 34, रा. वर्धमान जैन, पारोळा), खाजगी पंटर शरद प्रल्हाद कोळी (वय 43 रा. चोरवड ता.पारोळा) अशी अटक करण्यात आलेल्यांची नावे आहेत.
नेमकं काय प्रकरण? –
मिळालेल्या माहितीनुसार, पारोळा तालुक्यातील लोणी बुद्रुक गावात तक्रारदार हे आपल्या परिवाराचा वास्तव्याला असून कुटुंबियांच्या नावे त्यांचे लोणी बुद्रुक शिवारात शेत आहे. या शेतजमिनीवर तक्रारदार यांना गावातील ‘विविध कार्यकारी सोसायटी’मधून कर्ज घेण्यासाठी त्यांच्या शेतजमिनीवर असलेल्या सातबारा उताऱ्यावर बोजा लावणे आवश्यक होतं. असे असताना तक्रारदार हे चोरवडी येथील तलाठी कार्यालयातील तलाठी सुभाष वाघमारे यांच्याकडे गेले. दरम्यान, त्यांना सांगितले की, तुमच्या व कुटुंबीयांच्या नावे असलेल्या शेतजमिनीच्या सातबारा उताऱ्यावर कर्जाचा बोजा चढण्याच्या मोबदल्यात 4 उताऱ्यांचे प्रत्येकी 200 रुपये प्रमाणे 800 रुपये आणि मागील कामाचे दोनशे रुपये असे एकूण 1 हजार रुपये द्यावे लागतील.
अन् एसीबीने पकडले रंगेहाथ –
यानंतर तक्रारदार यांना पैसे द्यायचे नसल्याने त्यांनी याप्रकरणी जळगाव लाचलुचपत विभागाच्या पथकाकडे तक्रार दिली. दरम्यान, पथकाने काल दुपारी तीन वाजता सापळा रचला. त्यानंतर तलाठी वाघमारे याने तक्रारदाराला खाजगी पंटर शरद कोळी यांच्या फोन पे वर पैसे टाकण्यास सांगत लाच मिळविण्याचा प्रयत्न केल्याने पथकाने दोघांना अटक केली. याप्रकरणी पारोळा पोलीस स्टेशनमध्ये गुन्हा दाखल करण्यात आला आहे. वाढत्या लाचखोरीच्या घटनांमुळे प्रशासनातील कर्माचाऱ्यांमध्ये खळबळ उडाली आहे.
हेही वाचा : सरपंचाला 10 हजारांची लाच घेणं भोवलं, जळगाव एसीबीने पंटरला पकडले रंगेहाथ, पाचोरा तालुक्यातील घटना
