जळगाव, 23 ऑक्टोबर : विधानसभा निवडणुकीच्या पार्श्वभूमीवर पोलीस प्रशासन अलर्ट मोडवर आले असून जळगाव जिल्ह्यात पोलिस प्रशासनाकडून जागोजागी नाकाबंदी करण्यात आली. जळगाव जिल्ह्यात ऑपरेशन ऑल आऊट, कोबींग/नाकाबंदी दरम्यान केलेल्या कारवाई दरम्यान, 1 कोटी 90 लाख, 65 हजार 412 रुपयांची रोकड जप्त करण्यात आली आहे. दरम्यान, पोलिसांकडून रोकड जप्त करण्यात आल्याच्या कारवाईने खळबळ उडाली आहे.
काय आहे संपुर्ण बातमी? –
विधानसभा निवडणुकी दरम्यान निवडणूक प्रक्रिया पार पाडण्यासाठी प्रशासनाकडून अगदी काटेकोटरपणे नियोजन केले जात आहे. असे असताना राज्यातील विधानसभा निवडणुकीची अधिसूचना जाहीर होताच, जिल्हा पोलीस अधीक्षक डॉ.महेश्वर रेड्डी यांच्या आदेशाने मंगळवारी जिल्हाभरात नाकाबंदी करण्यात आली होती.
रोकड जप्तीची कारवाई –
नाकाबंदी दरम्यान पोलिसांनी चाळीसगाव ग्रामिण पो.स्टे. हद्दीतील जामडी येथे लावण्यात आलेल्या एसएसटी पॉइंटवर दुपारी 1 वाजेच्या सुमारास नाकाबंदी दरम्यान नागदकडुन चाळीसगावकडे जात असलेल्या महिंद्रा वाहनाची तपासणी केली असता वाहनामध्ये 7 लाख 22 हजार 500 रोख रक्कम मिळुन आली. पोलिसांनी रक्कम जप्त केली असुन ट्रेझरी येथे जमा केली आहे.
कासोदा पोलीस स्टेशन हद्दीतील फरकांडे फाट्याजवळ ऑल आउट स्किम नाकाबंदी करीत असताना, एरंडोलकडून येणारी पांढऱ्या रंगाची क्रेटा ही सांयकाळी 5 वाजून 45 मिनिटांच्या सुमारास थांबवून तपासणी केली असता 500 व 100 दराच्या नोटा मिळुन आल्या. यावेळी पोलिसांनी रक्कम तपासली असता 1 कोटी 45 लाख रुपये असल्याचे समजते. याप्रकरणी पुढील कारवाई सुरू असल्याची माहिती समोर आली आहे.
भडगाव पोलीस स्टेशन हददीतील पारोळा चौफुली भडगाव येथे नाकाबंदी दरम्यान वाहनाची तपासणी करताना 1 लाख 49 हजार रुपये रोख मिळुन आले. दरम्यान, सदर रक्कम पुढील कारवाईसाठी पाचोरा भडगाव विधानसभा मतदार संघातील एफएसटी पथक क्र.3 यांच्या ताब्यात देण्यात आलेले आहे. जामनेर पोलीस स्टेशन हदीतील नेरी येथे नाकाबंदी दरम्यान एक इसमाच्या ताब्यातुन 4 लाख 46 हजार 120 रुपये मिळून आल्याने ते जप्त करण्यात आलेले आहेत.
2 कोटींची रोकड जप्त –
जळगाव जिल्ह्यात पोलिसांकडून ऑपरेशन ऑल आऊट, कोबींग/नाकाबंदी दरम्यान करण्यात आलेल्या कारवाईत 1 लाख 58 हजार 620 रुपयांची रोकड जप्त करण्यात आली आहे. यासोबतच दारूबंदी प्रकरणात 6 लाख 13 हजार 992 रुपयांची दारू तसेच अंमली पदार्थ प्रकरणांत 3 लाख 10 हजार 800 रूपयांची किंमतीचा गांजा जप्त करण्यात आला आहे. यासोबत इतर 23 लाख 23 हजार रुपये किंमतीचे वाहने देखील जमा करण्यात आले आहेत. एकूण जप्त केलेल्या कारवाईत 1 कोटी 90 लाख 65 हजार 412 रुपये इतके आहे.
हेही वाचा : विधानसभा निवडणुकींसाठी जळगाव जिल्हा सज्ज! निवडणुकीसाठी काटेकोर नियोजन
