जळगाव, 12 फेब्रुवारी : छत्रपती शिवाजी महाराज जयंतीनिमित्त जळगाव शहरात 18 ते 20 फेब्रुवारी 2026 दरम्यान विविध स्पर्धा व सांस्कृतिक कार्यक्रमांचे आयोजन करण्यात आले असल्याची माहिती जिल्हाधिकारी रोहन घुगे यांनी दिली.
छत्रपती शिवाजी महाराज जयंती साजरी करण्याबाबत आयोजित आढावा बैठकीत ते बोलत होते. 18 फेब्रुवारी रोजी सकाळी 8.00 वाजता संभाजी राजे नाट्यगृह शेजारील मैदानावर गडकिल्ले तयार करण्याची स्पर्धा आयोजित करण्यात आली आहे. या स्पर्धेसाठी आवश्यक माती, विटांचे तुकडे व इतर साहित्याची व्यवस्था प्रशासनातर्फे करण्यात येणार असून परिसरात पाणी, प्रकाशयोजना व बॅरिकेडिंगची सोय केली जाणार आहे.
त्याच दिवशी सकाळी 9.00 वाजता भाऊचे उद्यान, काव्य रत्नावली चौक येथे विद्यार्थ्यांसाठी चित्रकला व रंगभरण स्पर्धा आयोजित करण्यात आली आहे. शाळा, कला संस्था तसेच व्यावसायिक चित्रकारांना सहभागी होण्यासाठी निमंत्रित करण्यात येणार असून या स्पर्धेत निवडलेल्या उत्कृष्ट चित्रांचे प्रदर्शन 19 फेब्रुवारी रोजी भरविण्यात येणार आहे.
19 फेब्रुवारी रोजी सकाळी भव्य मिरवणुकीचे आयोजन करण्यात आले असून संध्याकाळी 6.00 ते 9.00 या वेळेत संभाजी राजे नाट्यगृह येथे छत्रपती शिवाजी महाराजांच्या जीवनावर आधारित नाट्य व सांस्कृतिक कार्यक्रम सादर करण्यात येणार आहेत.
20 फेब्रुवारी रोजी संध्याकाळी 6.00 ते 9.00 या वेळेत संभाजी राजे नाट्यगृह येथे छत्रपती शिवाजी महाराजांच्या शौर्यगाथांवर आधारित पोवाडा कार्यक्रमाचे आयोजन करण्यात आले आहे.
शिवजयंती निमित्त आयोजित गड किल्ले स्पर्धेत,सांस्कृतिक कार्यक्रम इतर कलाकृतीमध्ये शहरातील ज्या नागरिकांना, कलाकारांना आपला सहभाग नोंदवायचा असेल त्यांनी जळगाव महानगरपालिकेचे जनसंपर्क अधिकारी आकाश जगताप मोबाईल क्रमांक -7798212124 या क्रमांकावर संपर्क साधावा. या बैठकीला निवासी उपजिल्हाधिकारी वैशाली चव्हाण, अतिरीक्त आयुक्त (मनपा) शोभा बाविस्कर तसेच संबंधित विभागांचे अधिकारी उपस्थित होते.
हेही वाचा : फार्मर कप प्रशिक्षणासाठी शेतकरी रवाना; जिल्हाधिकारी रोहन घुगे यांनी दाखवला बस ला हिरवा झेंडा
